Menu
Menu
Kalaallit Nunaannut piujuartitsisumik nioqqutissanik assartuineq?
Brugsenimi pisiniartartutta ilaasortattalu pisiniarfiutitsinni tamani pitsaasunik nutaanillu aamma unammillersinnaatitsisunik akilinnik akigissunillumi pisiniartarnissamut pitsaanerpaanik periarfissaqarnissaat anguniagaraarput. Piunitsinnut tunngaviulluinnarpoq, suliassarpullu tamanna pitsaanerpaamik naammassiumallugu sapinngisarput tamaat iliortarpugut… ullut tamaasa, ukioq naallugu. Kujataani Nanortalimmiit avannaani Ilulissat tikillugit pisiniarfiuteqarpugut, pisiniarfiutitsinnilu nerisassanik suliaqarneq nioqquteqarnerlu kaaviiaartitatsinnut ilassutaanerpaasarput.
Uagut niuertarfeqarfinnik ingerlatsisutut pisortat assartuinermik suliffeqarfiutaasa periarfissiissutai pinngitsoorsinnaanngilagut. Nioqqutissat ulluinnarni atugassat pingaarutillit asiupallassinnaasullu sukkanerpaamik pisiniarfitsinnut apuunneqartarnissaat pisariaqartipparput, immikkulli niuernermik ingerlatsisutut unammilligassaqarnitsinnik aamma eqqumaffigineqartariaqartunik naammaginartunik atugassaqartitsinissaq pisariaqarpoq.
Brugsenimi assartuinermut nassiussuinermullu pitsaanerpaanik aaqqiissutissarsiornissarput soqutigiuaannarparput. Siunissamilu timmisartoqarfinnut nutaanut timmisartukkut assartuinissamut qanorluunniit periarfissaqarluartigigaluarpat umiarsuakkut assartuineq Kalaallit Nunaanni sumiiffinnut tamanut ulluinnarni atugassanik pingaarutilinnik pilersuinitsinni attaveqaasersuinitsinnut tunngaviujuaannassaaq.
Nioqqutissanik pitsaasunik nutaanillu pisiniarfiutitsinnut pilertortumik pisariitsumillu assartuisinnaanissarput pisariaqartipparput, taamaattorli aamma piujuartitsisumik akisussaassuseqartumillu assartuisinnaarusuppugut. Kisianni ataavartumik kinguaattorujussuarnerit kukkusumillu suliarinnittoqartarnerit, kissaatigisatsinnullu naalaarniarnissamut kajumissuseqartoqartinnagu misigisimajuarparput nioqqutissat asiupallassinnaasut piffissaagallartillugu apussinnaanerinut unammillernartumut inissinneqartuartarnerput.
Nioqqutissanik asiupallassinnaasunik pingaartitsilluni umiarsuakkut tutsuiginartumik assartuisartoqarnissarput pisariaqartipparput
Taamaattumik Royal Arctic Line (RAL) 2023-mi juulip 21-anni Atlantikukkut ingerlaarfissamut allannguutinik isummerfiginninnissaq pillugu saaffiginnimmat isumalluaqaagut. RAL-ip saaffiginnissutaani sammisat aalajangersimasut kingusinnerusukkut webinarikkut saqqummiunneqarlutillu oqallisigineqartussat isummerfiginissaannut periarfissinneqarpugut.
Misissuinermi tamatumani RAL-imullu siornatigut saaffiginnissutitsinni erseqqissaasarsimavugut Brugsenip pingaarnertut uku soqutigisarigai:
Nassiussatta, ingammik nioqqutissat ulluinnarni atugassat, Århusimit Nuummut Nuummiillu illoqarfinnut allanut sukkanerpaamik anngunneqartarnissaat pisariaqartipparput.
Umiarsuit pilersaarutit malillugit piffissaq eqqorlugu apuuttarnissaat pisariaqartipparput naleqartitatsinnut tamanut atatillugu nioqqutissat pinngitsoorsinnaannginnatsigit.
RAL-ip qerisunut nillataartunullu eqqortumik suliarinnittarnissaat pisariaqartipparput, kukkusoqarneratigut pisariaqanngitsumik nerisassanik eqqaasoqannginniassammat kingornatigullu kaaviiaartitatigut annaasaqartoqannginniassammat.
Ingerlaarfissanik pilersaarusiornermi pisisartutta ilaasortattalu pisiniarnermut atatillugu ileqquisa eqqarsaatigineqartarnissaat pisariaqartipparput, tallimanngornerit arfininngornerillu pisiniarfinni ullutut tunisiffissatut pingaarnerpaajuarlutik – taamaattumillu pingasunngornerit sisamanngornerillu Nuummut apuuffissatut tallimanngornermit pitsaanerungaarlutik.
Piviusorsiornerunngitsoq?
Kissaatigisavut erseqqissumik oqaatigereerpavut, RAL-imulli attaveqarnitsinnut ajornartorsiutitsinnullu atatillugu pissutsit piviusut suuppat?
2023-mi qaammatini arfineq-pingasuni siullerni maannamut nioqqutissat pisiarineqarneranni akii naapertorlugit 1,3 millionit kronit sinnerlugit nalillit eqqareersimalerpavut, kinguaattoornernik imaluunniit RAL-ip containerinik kukkusumik suliarinnittarnerinik pissuteqartumik. Nioqqutissat nillataartitsivimmiititassat eqqarneqarajupput kingusippallaartukkut apuunneqarsimasarmata containerilluunniit nillataartitsiviit qerititsiviillu kukkusumik suliarineqartarmata. Nerisassanik eqqaanersuit, kaaviiaartitatigut annaasat, sulisutta nioqqutissanik immikkoortiterinermik suliaqarnerujussuat, pisiniartartorpassuit pisiniarfinni nutaanik pisiassaqalersimannginnerannik tupigusuutiginnittut … tamakkua tamarmik saniatigut kinguneraat aningaasartuuteqarnerunerit, pakatsisitsinerit nerisassarparpassuarnillu asiutitsiinnarujussuarnerit!
Tukuma Arctica kinguaattoornerata kingunipilui misigeqaagut. Umiarsuup ataasiinnaap kinguaattoornerata kinguneranik pisiniarfiit tamarmik nioqqutissarpassuarnik amigaateqarput, umiarsuarlu tikikkaangat nioqqutissanik qaangiuttoorsimasunik eqqaasoqartarpoq, sulisut saniatigut sulisariaqarnerminnik naammagisimaarinninneq ajorput kingornatigullu kaaviiaartitatigut annaasaqartoqartarluni.
Neriuutigisimagaluarparput RAL-ip kissaatigisavut nammineq ujartornikuusatik malillugit iliornissaat, tamannali aaqqiissutissarsiorfigineqarnani umiarsuup Nuummut pingasunngornikkut sisamanngornikkulluunniit tikittalernissaanik siunnersuuterput itigartinneqarpoq piviusorsiornerunngimmanngooq. Atlantikukkut ingerlaarfissamik nioqqutissat Danmarkimiit Kalaallit Nunaannut apuunneqartarnissaannik pingaartitsiviusumik sooq pilersaarusiortoqarsinnaannginnersoq paasitinneqanngilagut. Pilersaarummi taanna taakkua sullitaannut pingaarnernut, ingammik niuertarfeqarfinni suliniuteqartunut, pitsaanerpaavoq. Umiarsuup pingasunngornikkut sisamanngornikkulluunniit apuuttarnissaa RAL-imut aamma iluaqutaassagaluarpoq, weekendimi umiarsuaq kinguaattoorsimatillugu ammasarfiit avataanni nioqqutissanik assartuisoqartariaqassanngimmat.
Atuisumut iluaqutaasumik piujuartitsilluni ineriartortitsineq?
Erseqqippoq RAL-ip Atlantikukkoortarneq nunatsinnullu nunatsinniillu assartuisarneq piujuartitsilluni, imaluunniit nungusaataanngitsumik, ineriartortitsivigerusukkai. Brugsenilu tamatuminnga tamakkiisumik tapersersuerusuppoq, CO2-millu aniatitsineq annikillisarneqarsinnaappat tamanna anguniagaassaaq pingaarutilik.
Nungusaataanngitsumilli ineriartortitsinerussava apuussiniaasaartoqarneratigut kukkusumillu suliarinnittoqartarneratigut nioqqutissat taama amerlatigisut eqqarneqartassappata?
Tamanna Kalaallit Nunaanni niuertarfeqarfinnik suliniuteqartunillu allanik – nerisassanik sukkasuumik assartuisoqartarnissaanik pisariaqartitsisunik – piujuartitsilluni ineriartortitsinerua?
Aamma Kalaallit Nunaanni atuisunut tamanna piujuartitsilluni ineriartortitsinerua? Nioqqutissat nillataartitsivimmiititassat asiujasut taakkuugajupput nioqqutissat inuiaqatigiinnik peqqinnerulersitseqataasinnaasut, soorlu paarnat naatitallu, neqit, immuliorfinni nioqqutissiat il.il.
Nioqqutissalli taakku qaangiuttuungajalerfiisa nalaani tunisaalertarput atuisartunillu pisariaqartinneqarnerpaasarlutik. Tamannalu ingammik inuiaqatigiinni sanngiinnersaasunut ajortumik sunniuteqartarpoq, taakku nioqqutissanik peqqinnartunik pisinngiinnartariaqarsinnaasaramik. Tamatuma saniatigut niuertarfeqarfiit nioqqutissanik suliarinninnerminnut aningaasartuutaat qaffakkiartortarput, tamannalu pisiassat akiinut sunniuteqartarpoq. Taamatut ineriartortoqarnera piujuartitsiviunngilluinnarpoq!
Soorunami Kalaallit Nunaannik niueqateqarniarnermik pisariillisaasariaqarpugut, nunatsinnulli assartugassat pilliutigineqassanngillat. RAL sullitaminut tusarnaartariaqarpoq niuertarfeqarfiillu pisariaqartitaminnik saqqummiussaat malillugit iliuuseqartariaqarluni, suliffeqarfillu piujuartitsinermut atatillugu anguniakkaminik sulissutiginnittariaqarpoq.
Aqqusinersuaq 4, 2 th. P.O.Box 1092 3900 Nuuk
Attaveqarfigitigut/Kontakt os
CVR 15787406
Kalaallit Nunaanni Brugseni pisianik utertitsisinnaasarpoq, imaluunniit aningaasartai utertissinnaasarpai pisinermiit ullut 14-it qaangiutsinnagit pisinermut uppernarsaat utertitsiniarnermi ilanngullugu takutinneqartillugu. Pisiaq ammarneqarsimassanngilaq.
Nioqqutissat nerisassat ilaanngillat.
Kalaallit Nunaanni Brugseni bytter gerne eller giver pengene retur inden for 14 dage fra købstidspunktet mod fremvisning af bon.
Varen skal være i ubrudt original emballage. Gælder ikke fødevarer.
© Copyright 2025 · Kalaallit Nunaanni Brugseni
Cookies og privatlivspolitik – Whistleblowerordning