Menu
Menu
Ukiumoortumik nalunaarusiaq 2024 Brugsenip saqqummiuppaa qullersaqarfimmilu nutaanik atorfinittitsisoqarluni
Kalaallit Nunaanni Brugsenip (KNB) siulersuisui maajip aallaqqaataani 2025-miit nutaamik qullersaqarfimmik pilersitsipput pisortanik nutaanik pingasunik inuttalimmik. Tassanilu aamma ukiumoortumut naatsorsuutit 2024-moortut saqqummiunneqarlutik. Ukiumoortumik naatsorsuutit inernerisa takutippaat angusat naammagisimaarnanngitsut, aamma ukiut siuliini kukkunerit annertuut aaqqinneqarsimasut.
Qullersaqarfiup nutaap KNB’p aningaasaqarnikkut iluarseeqqinnissaq aammalu suliffeqarfiup Kalaallit Nunaanni suliffeqarfittut pingaaruteqarnerpaat ilaattut inissisimaannarnissaa aammalu pilersaarusiukkamik ineriartortinneqarnissaa siuttuuffigissavaat.
Ukiumoortumik naatsorsuutit 2024-imi aamma 2023-imi amigartoorfiusut
KNB’p siulersuisuisa 2024-imi ukiumoortumik naatsorsuutit aamma piujuaannartitsinermut nalunaarusiat akuereqqammerpaat. Ukiumoortumik naatsorsuutit KNB’ip aningaasaqarnikkut unammilligassaqarneranik erseqqarissumik takussutissiipput. Naak 2023-imut sanilliullugu kaaviiaartitat 3%-imik qaffariaateqarsimangaluartut, akileraarutit ilanngaatigereerlugit ukiumi angusat -14,5 mio. koruuniusimapput. Angusat sunnerneqarsimapput pisiniarfiup illutaanik -15,5 mio. koruuninik appartitsinermik sunnerneqarsimavoq aammalu kursimit +3,4 mio. koruuninik iluanaaruteqarnernit.
2023-imi akileraarutit ilanngaatigereerlugit angusat, suliffeqarfiup quersuarmi uninngasut nalingi 21,6 mio. koruunimiittut annertuumik kukkuneqarsimaneri aqqinneqarsimapput 1 mio. koruunimiit maannakkut -14,9 mio. koruuninut.
Taamatut pitsaanngitsumik angusaqarnermut peqqutaasut annersarivaat nioqqutissanik pisortornerup aamma quersuarni aqutsinerit naammaginanngitsumik ingerlanneqarsimaneri, minnerunngitsumillu ERP-systemimut nutaamut ikaarsaarnermi nioqqutissat eqqortumik akilersorneqartarsimannginneri.
– KNB-ip ukiuni kingullerni aningaasaqarnikkut ingerlanera pitsaasimanngilaq, tamannalu qisuariarfigijaarsimanngilarput. Maannakkulli tamakkersorluni muminganut saatsinniarlugu ukkatarineqarpoq. KNB’ip qullersai aamma sulisui 2024-imi ukiup affaa kingulleq tamaviaarlutik ERP-systemimut ilanngulluarnissamut inaarsaallutik ilungersorsimapput, pingaartumik nioqqutissanik pisiortornermut aammalu nioqqutissanik uninngasuuteqarnermut tunngasunut suleriaatsit iluarsaanneri ingerlanneqarsimallutik. Suli angusassarput tikissimanngilarput, kisianni 2024-ip aallartinneranut sanilliullugu pitsaanerungaartumiilersimavugut, naatsorsuutigaarpullu 2025-ip ingerlanerani ingerlatseriaaserput, systemigut aamma isertitagut nalimmassalerumaartut, niuernikkut pisiortornikkullu atugassarititaasut allanngorartuartut siuarsimaffigeqqinnerulernerisigut, taama siulersuisuni siulittaasoq Avijâja Rosing-Olsen oqaluttuarpoq.
KNB’ip taamaasilluni naatsorsuutigivaa kingusinnerpaamik 2026-imi suliffeqarfiup naatsorsuutai iluanaaruteqarfiusumik angusaqarfiujumaartut.
– 2024 KNB-imut assut ilungersunartorsiorfiusimavoq, qullersat akornanni taarseraaffiusimalluni aammalu naleqqussarfiusimavoq pissutsinut piviusunut nutaanut. Taamaattorli aamma maluginiarsimavarput, ukioq ajoriinnagassaanngitsumik naggasersimallugu, allaat 2025-ip aallartinnerani pissutsit nutaat ajoriinnagassaanngitsunik takussutissartallit malugilereersimavagut, taama pisortaanerugallartoq Kent Helberg itisiliivoq.
Qullersaqarfik nutaaq maajip aallaqqaataani 2025-imi aallartissaaq
KNB-imi siulersuisut aasaq 2024 aallarnerfigalu aningaasaqarnerup ilorraap tungaanut saatsinniarnissaa ukkatarisimavaat aammalu ukiup 2025-ip aallartinnerani qullersaqarfimmik nutaamik pilersitsinissaq suliniutigilersimallugu.
– Siulersuisut 2024-imi pingaarnertut qulakkeerniarsimavaat suliffeqarfiup aalajaatsumik pitsaanerusumillu ingerlanneqarnera piffissami qaninnermi ilorraap tungaanut saatsikkiartornissaa. Tassanilu pisortaagallartup Kent Helberg-i annertuunik allannguisoqarnissaanik suliaqarsimavoq, piffissap sivikittup iluani takutissinnaasimallugit angusat pitsaasut. Tulluusimaarutigaakka KNB-imi sulisut tamarmik kivitseqataasimanerannut, pingaartumik 2024-imi ukiup affaa kingulleq annertuunik sipaarniarfissanik iluarseeqqinnissanillu aaqqissuussinerup ingerlanneqarnerani.
– Aamma uanga nuannaarutigivara maajip aallaqqaataaniit 2025-imi nutaamik qullersaqarfimmik nukittuumik aallartitsinissarput nalunaarutigissallugu. Iluatsissimavarput aqutsisut misilittagaqarluartut pikkorissullu pissarsiarinissai, taakkulu piginnaasai tassaapput KNB’ip siunissami ineriartortinnissaanut pisariaqartitavut, taama siulersuisuni siulittaasoq Avijâja Rosing-Olsen oqaluttuarpoq.
Pisortaaneq nutaaq
Allan Kristoffersen pisortaanertut nutaatut atorfinitsinneqarpoq, taannalu suliffeqarfissuarmi Coop Danmarkimi pisortaanerusimavoq. Allan aallarteqqaarami Vejlep ungasinngisaani Brugsenimi aallartinnikuusimavoq kingornalu pisortaanertut misilittagaqarfigisimavai Coopip pisiniarfiutai Kvickly aamma SuperBrugsen allallu aamma unammillertit, Matas aamma Spar.
– Qilanaarivara KNB-imi peqataalernissara, Kalaallit Nunaanni suliffeqarfiit pingaarnersaannut akuullunilu aamma Coopimi suleqatigineqartuni namminersortuni brugsenit peqatigiiffiisa annersaasumi. Qilanaarpunga Kalaallit Nunaannut nuunnissannut suleqatillu pikkorissorpassuit, avataani suleqatigisat minnerunngitsumillu aamma ilaasortat 30.000 sinnerlugit amerlassusillit naapinnissaannut, taama Allan oqaluttuarpoq.
Allan ilaquttanilu apriilip ingerlanerani Nuummut nuussapput, Nuummilu ulluinnarni inuuneq sungiunniartussaallugu. Ilaqutariittut tamarmik Nuummukarnissaminnut qilanaarput.
Aningaasaqarnermut pisortaq nutaaq
Maajip aallaqqaataani KNB-imi aningaasaqarnermut pisortatut Malene Brobergip ingerlatsineq aallartissavaa. Malene nuumminngaaneerpoq maannakkullu Sisimiuni najugaqarallarpoq. Qeqqata kommuniani Aningaasaqarnermut Ilinniartitaanermullu pisortatut suliffimmiit nuussaaq. Malene Kalaallit Nunaanni namminersortuni pisortallu suliffeqarfiutaanni aningaasaqarnermut naatsorsuuserinermullu ukiuni arlalinni misilittagaqarluareerpoq, soorlu Pisiffimmi aamma Mittarfeqarfimmi.
– Qilanaarpunga KNB-imi atorfimmi nutaami sulilernissannut, tassuunakkullu aamma Kalaallit Nunaanni inuiaqatigiinni suliffeqarfimmut pingaarutilerujussuarmik inissisimasumut tunniussaqarnissannut. Qilanaarivara misilittakkakka atorlugit pisortaaqatit, aqutsisut sulisullu peqatigalugit tunniussaqarnissara, uangalu ukkatarissavara akimut ersarittumik suleriaaseqarnissaq, aningaasaqarnikkut akisussaassuseqarlunga siunissamut aaqqiissutissanik ineriartortitsinissaq, taama Malene oqaluttuarpoq.
Tuniniaanermut ingerlatsinermullu pisortaq nutaaq
Februaarip aallaqqaataani 2025-imi Mark Kobberrød isumaqatigiissuteqarfigineqarpoq qullersaqarfimmi tuniniaanermut ingerlatsinermullu pisortatut atorfeqalernissaa, akisussaaffigissavaalu suliffeqarfiup niuernikkut ingerlatsinera. Mark KNB-imi tuniniaanermut ingerlatsinermullu pisortaasimavoq. KNB-imi sulinikkut misilittagaqarluartuuvoq aammalu Danmarkimi brugsenit peqatigiiffiini arlalinni pisiniarfimmi pisortatut aamma tuniniaanermi pisortatut sulisimalluni.
– Qullersaqarfimmi peqataalernissara qilanaarivara, niuernikkullu ingerlatsinermi suleqatigiinnut siuttuunissannut. 2010-mili peqataalersimavunga Kalaallit Nunaannut siullermeerlunga nooqqaarama, qilanaarivaralu ingerlatsinermi aalajaatsumik ingerlatsinerup pilersinnissaa, kisianni aamma ilaasortatsinnut pisiniartartutsinnullu iluaqutaasussanik siunissamut alliartortitsinissaq ineriartortitsinissarlu sulissutigissallugu, taama Mark oqaluttuarpoq.
Ukiualunnguit Sønderjyllandimi najugaqarsimavoq, Danmarkimi brugsenit peqatigiiffiisa annersaanni Brugsforeningen for Als og Sundeved-imi tuniniaanermut pisortaasimalluni, maannalu Mark ilaquttanilu Nuummi illusisimapput.
– 2024-imi ukiup affaa kingulleq siuariarfigereerlugu 2025-ilu pitsaasumik aallartereerlutigu, siumut isiginiarpugut. Kaaviaartitavut annertusiartorput ilaasortallu KNB-imik iluarisimaarinnipput. Ungasinngitsumi pisiniarfimmik nutaamik ammaassaagut, qullersaqarfillu nutaaq pilersinneqartup sulisuvut pikkorissut peqatigalugit qulakkeerniassavarput suli nunatsinni suliffeqarfiit isumaqarnersaasut akornaniinnissarput, taama naggasiilluni Avijâja Rosing-Olsen oqaaseqarpoq.
Aqqusinersuaq 4, 2 th. P.O.Box 1092 3900 Nuuk
Attaveqarfigitigut/Kontakt os
CVR 15787406
Kalaallit Nunaanni Brugseni pisianik utertitsisinnaasarpoq, imaluunniit aningaasartai utertissinnaasarpai pisinermiit ullut 14-it qaangiutsinnagit pisinermut uppernarsaat utertitsiniarnermi ilanngullugu takutinneqartillugu. Pisiaq ammarneqarsimassanngilaq.
Nioqqutissat nerisassat ilaanngillat.
Kalaallit Nunaanni Brugseni bytter gerne eller giver pengene retur inden for 14 dage fra købstidspunktet mod fremvisning af bon.
Varen skal være i ubrudt original emballage. Gælder ikke fødevarer.
© Copyright 2025 · Kalaallit Nunaanni Brugseni
Cookies og privatlivspolitik – Whistleblowerordning
