Niuernermik ingerlatseqatigiiffik kalaallinit pigineqartoq Kalaallit Nunaanni Brugseni maanna ukioq 2025-imi naatsorsuutit saqqummerseqqammerpai, tassungalu aamma atatillugu periusissiaq annertuunik anguniagaqarfiusoq saqqummersillugu, tamatumani ilaasortanut annerusumik utertitsisoqarnissaanik anguniagaqarfiuvoq nunatsinnut iluaqutaasussamik.

2025-imi Brugseni ukiumut kaaviaartitai 8 procenti qaangerlugu malunnaatilimmik qaffariaateqarfiusimavoq nutaamillu ERP-imik aaqqissuussinerit unamminartumiititsisimasut aaqqinneqarsimallutik. Taamaasilluni ukiuni arlalinni amigartoorutaasumik ingerlatsisimaneq kiisami mumisinneqarsimavoq, akileraarutillu ilanngaatigereerlugit ukiumoortumik nalunaarusiap inernerilerlugu 7 mio. koruunit tikillugit.

Siulersuisuni siulittaasup Avjâja Rosing-Olsenip immikkut maluginiaqquvaa nukittuumik ataatsimoorneq peqqutaasimasoq Brugsenip ukiumi 2025-imi pitsaasumik angusaqarfiusimaneranut:

– Tulluusimaarutigilluinnarpara nukittuumik ataatsimoorluni suleqatigiinnerup Brugseni ajornartoornerminit qaangiisimasinnaanera. Suli allanngoriartorfimmiippugut, kisianni takusinnaalereerparput Brugsenip teqeqquini tamani annertuumik sulisoqarsimanera pitsaasumik sunniuteqarsimasoq. Ataatsimoornitsigut ilorraap tungaanut aallarnissamut eqqortumik pisarialimmillu iliuuseqarsimavugut, tamatumallu kingunerivaa ullumi aningaasaqarnikkut patajaannerusumik inissisimalersimanitsinnik. Siulersuisuni suleqatikka qutsavigerusuppakka aamma illoqarfinni BIS-it annertuumik suleqataasimaneranut suleqatigiilluarsimanitsinnullu. Siulersuisunit qilanaarivarput siunissamut annertuunik siunnerfeqarluta anguniagaqarnissatsinnut.

Kaaviaartitat qaffakkiartorneranut peqqutaavoq aasaanerani niuernerup annertusisimanera, pingaartumik Nuummi Ilulissanilu takornariaqarnerusimaneranik tunngavilimmik, pisiniarfimmillu nutaaliaalluinnartumik nutaamik Nuussuarmi Brugseni Nataliemik ammaasimanermik aammalu annertunerusumik qitiusumiit pisiniarfinnut tamanut ataasiakkuutaanullu akikillisanik nittarsaassinerup aaqqissuunneqarnerata pisiniat aamma ilaasortat akuutinneqarnerulersimapput.

– Ilaasortatsinnut utertitserusunneq tunngavigivarput annertuunik anguniagaqarusuttarnitsinnut, unammillersinnaassuseqarnermullu naleqqussarsinnaassuseqarluta. Tamannalu 2025-imi iluatseqqipparput. Maannakkut aningaasartuutit nittarsaassinerlu ataqatigiinnerusumik aaqqissugaalernerisa kingunerivaa 25,97 mio. koruuninik inuiaqatigiinnut ilaasortatsinnullu Divi Plussi aqqutigalugu utertitsisinnaasimagatta, taama pisortaaneq Allan Kristoffersen oqaluttuarpoq.

– Maannakkut takusinnaalerpavut allannguuterpassuit inerneri siulersuisunit, aqutsisooqatigiinnit minnerunngitsumillu sulisorpassuatta 600 missaaniittut ikioqatigiillutik kivitseqatigiissimaneri. Kikkut tamarmik akisussaaffimmik kivitseqataasimapput, maannakkullu imminut akilersinnaasumik ingerlatsilersimalluta. Ataatsimoornerput nukittuffigivarput, qularinngilaralu ukiuni tulliuttuni siuariartorneq suli annertusiartussasoq inernerilu pitsaasut ilaasortatsinnut, pisisartutsinnut nunatsinnilu inuiaqatigiinnut iluaqutaajumaarput, ilanngullugu Allan Kristoffersenip oqariartuutigivaa.