Menu
Menu
Kalaallit Nunaanni Brugseni pisiniarfeeqqamik, Brugseni Natalie-mik, ammaanersiornermi kaffisoriartoqqusivoq marlunngornermi januaarip 29-ani nal. 9.00.
Brugseni marlunngornermi januaarip 29-ani Nuussuarmi Nuummiittumi pisiniarfittaami ammaappat ulloq persuarsiorfiussaaq. Ulloq naallugu ammaanersiornermi pitsaasunik neqerooruteqassaaq, kaffisortitsisoqassaaq, paggatsitsisoqassaaq nuannersunillu allanik sammisaqartitsisoqassalluni.
Brugseni januaarip aallaqqaataa 2019 aallarnerfigalugu Butik Natalie-toqqamik piginnittunngorpoq pisiniarfik pequtinillu nutarsaaneq ulapputigilerlugu, pisiniarfeeraq pisiniarfinni allanisulli nutaaliaatiginiassammat.
“Brugsenimi qilanaaraarput Butik Natalie-toqqami pisiniarfik kusanartoq nutartigarlu takutinnissaa. Nuussuarmi pisisartuvut orneriaannaasaminnik Brugsenimi pisiniarfinni allanisulli akigissaartigisunik pisiassaatilimmik pisiniarfeeraqalernissartik qilanaarisinnaavaat. Pingaartipparput Butik Natalie-p pissusitoqaanik ingerlatsiinnarnissarput, taamaattumik aalajangerpugut pisiniarfiup ammasarfitoqai taagutitoqaalu atuutitiinnarniarlugit maanna pisiniarfik ’Brugseni Natalie’-mik taaguuteqalerluni. Nuummi sumiiffinni pingasuni pisiniarnissamut periarfissaqarlualersitsinissarput qilanaaraarput, iluaqutissiissutigisinnaasarpassuatsinnillu atorluaanissaq kikkunnut tamanut ajornannginnerulersillugu,” pisortaq Susanne Christensen oqaluttuarpoq.
Pisiniarfik immikkut aqutsisoqassaaq pisiniarfiulissallunilu Brugseni Nuup aamma Brugseni Qinngorput naligisaannik. Niuertarfimmi aqutsisussaq nutaaq, Jørgen Hammond, Brugsenimi ilisarisimaneqarluarpoq. Jørgen Hammond Brugseni Nuuummi nerisassaarniarfimmi pisortatut atorfeqarnikuuvoq, maannalu Nuussuarmi soqutiginartorpassuarnik nutaanik suliassaqarnissani qilanaarisinnaavaa. Pisiniarfeeraq nutaaq Nuussuarmi iluaqutaalluassaaq pisiassanik qinigassaqarluarsinnaassammat pitsaasunillu neqerooruteqarsinnaassalluni Brugsenini allanisut.
Niuertarfimmi aqutsisoq Jørgen Hammond pillugu paasissutissat:
Jørgen Hammond, Uummannami inunngorlunilu peroriartorsimasoq, Brugsenimi Nuummiittumi sivisuumik atorfeqarsimavoq. 43-nik ukioqarpoq ukiullu qulit sinnerlugit Brugsenimi sulisimalluni. Ukiuni taakkunani uku atorfigisimavai:
– Nuummi Brugseneeqqami tullersortitut ukiut marluk
– Nuummi Brugseneeqqami immikkoortortami pisortatut ukiut marluk affarlu
– Nuummi Brugsenimi nerisassaarniarfimmi pisortatut ukiut arfinillit affarlu
Tamatuma saniatigut ukiup affaani kingullermi Brugseni Qinngorput-mi niuertarfimmi aqutsisuugallarpoq.
Jørgen Hammondip nuliaraa Frederikke Hammond ukiorpaalunni Brugsenimi Nuummiittumi sulisuusimasoq. Frederikke Hammond Brugseni Natalie-meeqataalissaaq tuniniaanermi pisortatut.
Inuit Jørgenimik ilisarisimannilluartut tatiginartutut, unneqqarissutut, eqinnaatsutut qiimajuartutullu ilisarisimavaat. Sulisunut pisortaallaqqissuuvoq sulisuminik paasinnittoq, aamma pisiniat pisariaqartitaannik paasinnillaqqillunilu ikiuiumatuvoq.
Jørgen Hammond amma Frederikke Hammond
Pisiniarfik oqaluttuassartaqarluartoq
Svend Give Olesenip, 1990-ikkut aallartilaarneranni Butik Natalie-mik sanaartortitsisup kingornalu niuertutut namminersortutut tamatuminnga ingerlatsisup, ukiorpassuarni pisimasorpassuit nuannersut eqqaamallugit nuannaarutigaa pisiniarfiup maanna Kalaallit Nunaanni Brugsenimut tunineqarsimammat.
“Brugsenimik piginnittutut nutaatut toqqaaninnut pissutaavoq qularutiginnginnakku taakku pisiniartartutoqqanik pisiniartarumaartunillu pitsaanerpaamik sullissisinnaasut Butik Natalie-mik ammaaqqaaratta pinitsitut. Brugseni pisinianik sullissilluarsinnaassaaq pisiassanillu qinigassaqarluartitsisinnaassalluni. Tamanna ilutigalugu qutsavigerusuppakka Butik Natalie-mi pisiniartartut, sulisut suleqataasimasullu! Taamatuttaaq Brugseni pisiniarfittaarnerani pilluaqqorusuppara. Pisiniarfik pisiniartartullu paarilluarisigit,” Svend Give Olesen tunisineq pillugu ilaatigut taama oqaaseqaateqarpoq.
Aqqusinersuaq 4, 2 th. P.O.Box 1092 3900 Nuuk
Attaveqarfigitigut/Kontakt os
CVR 15787406
Kalaallit Nunaanni Brugseni pisianik utertitsisinnaasarpoq, imaluunniit aningaasartai utertissinnaasarpai pisinermiit ullut 14-it qaangiutsinnagit pisinermut uppernarsaat utertitsiniarnermi ilanngullugu takutinneqartillugu. Pisiaq ammarneqarsimassanngilaq.
Nioqqutissat nerisassat ilaanngillat.
Kalaallit Nunaanni Brugseni bytter gerne eller giver pengene retur inden for 14 dage fra købstidspunktet mod fremvisning af bon.
Varen skal være i ubrudt original emballage. Gælder ikke fødevarer.
© Copyright 2023 · Kalaallit Nunaanni Brugseni
Cookies og privatlivspolitik – Whistleblowerordning