Menu
Menu
Kalaallit Nunaanni Brugseni Butik Natalie-mik piginnittuulissaaq Nuussuarmilu Brugsenimik nutaamik ammaassalluni.
Qanittukkut Nuussuarmi innuttaasut Nuup Qinngualu akornanni pisiniarnissamut periarfissaqalissapput. Butik Natalie Kalaallit Nunaanni Brugsenimit kingoraarneqassaaq januaarip aallaqqaataa 2019 aallarnerfigalugu, ukiullu affaata siulliup ingerlanerani Brugsenitut nutaatut ammassaaq. Taamaalilluni pisiniarfik taanna Nuummi pingajorilissavaat Brugseneeqqat marluk Brugsenit Panduro Hobby-llu illoqarfiup qeqqaniittup saniatigut.
Pisiniarfik oqaluttuassartarpassualik
Svend Give Olesenip, 1990-iikut aallartilaarneranni Butik Natalie-mik sanaartortitsisup kingornalu namminersorluni niuertutut pisiniarfimmik ingerlatsisup nuannaarutigaa pisiniarfik maanna Kalaallit Nunaanni Brugsenimut tunineqarmat oqaluttuassartarpassuilu nuannersut eqqarsaatigisinnaagamigit.
– Ukiorpassuit nuannersut Kalaallit Nunaanneereerluni Butik Natalie-millu tunngaviliillunilu ineriartortitsereerluni imaannaasimanngilaq pisiniarfimmik ’iperaanissaq’. Ukiuni kingullerni allanut attartortippara nalornissutigigakku niuertutut ingerlaannarusunnerlunga. Piffissami ingerlareersumi sommelieritut (viinnilerisutut) takornarianillu angallassisutut ilinniarsimavunga ilaatigullu Spaniamiutut ilinniarlunga. Maanna misigivunga piffissanngortoq tamakkununnga tunngasunik suliaqarnissamut, Svend Give Olesen oqaluttuarpoq.
– Brugsenimik piginnittutut nutaatut toqqaaninnut pissutigaara misigigama qularinagu taakku pisiniartartutoqqannik pisiniartartussanillu pitsaanerpaamik sullissisinnaassasut Butik Natalie-mik ammaanitsinni pisarnitsitut. Brugseni pisiniartartunik sullissilluarsinnaassaaq pisiassanillu qinigassaqartitsilluassalluni. Tamatuma saniatigut Butik Natalie-mi pisiniartartut, sulisuusimasut suleqataasimasullu qutsavigingaarusuppakka! Taamatuttaaq Brugseni pisiniarfimmut tunngatillugu pilluaqqungaarusuppara. Pisiniarfik tassanilu pisiniartartut paarilluarisigit, Svend Give Olesen tunisinermini taama oqaaseqaateqarpoq.
Nuussuarmi Brugseni nutaaq
Nuummi tuniniaanermi pisortaq, Jes Nyborg, suliniummik nutaamik ima oqaaseqarpoq:
– Nuussuarmi innutaasunut qanittumi pisiniarnissamut amerlanerusunik periarfissaqalersitsinissarput qilanaaraarput Nuummi Qinngutsinnilu periarfissaqarluareermat. Sivisuumik pisiniarfissaqqissumik ujaasisimavugut, Butik Natalie-millu kingornussinissaq isumaqatiginninniutigigatsigu ingerlaannaq iliuuseqarpugut. Pisiniarfik pingaarnertut nerisassanik assigiinngitsorpassuarnik qinigassaqartitsiffiussaaq pisiniarfinni allanisulli pitsaassuseqartunik akigissaartigisunillu.
Direktøri Susanne Christensen naapertorlugu pisiniarfimmik ammaaneq Kalaallit Nunaanni Brugsenip takorluugaanik nutaamik, Siulersuisuunerit 2018-ip aallartinnerani aalajangiiffigisaanik, eqqortitseqataassaaq:
– Tulluusimaarutigeqaara Nuummi illoqarfiup ilaani pingasuni pitsaalluinnartunik pisiassaqartitsinissamut qanittukkut periarfissaqalissagatta. Pisiniarfik nutaaq Ilulissani pisiniarfissamik ammaanissamut peqatigitillugu takorluukkatsinnik matuminnga eqqortitseqataassaaq: ”Piginneqatigiilluta ineriartortitsisa, sapinngilagut”. 2019-illu affaani siullermi pisiniarfissanik marlunnik ammaanissarput aqqutigalugu uppernarsaqqipparput Kalaallit Nunaanni sumiiffinni arlalinni ineriartortitserusulluta. Ilaasortavut aalajaatsut sulisuvullu eqiasuitsut ikiortiginagit tamakku angusinnaasimassanngikkaluarpavut!
Suli amerlanerusunik sulisoqartariaqarneq
Nuussuarmi pisiniarfittaarneq ilutigalugu amerlanerusunik pikkorissunik sulisoqartariaqalissaagut. Pisiniarfik immikkut aqutsisoqalissaaq, taassumalu akisussaaffigissavaa pisiniarfimmik najoqqutassianillu ineriartortitsinissaq.
– Sulisussarsiorneq aallartisareerparput, Nuummi tuniniaanermi pisortaq, Jes Nyborg, oqaluttuarpoq. Suli amerlanerusunik sulisoqartariaqalissaagut pisiniarfimmi tunisassiarineqartunik assigiinngitsunik ingerlatsisussamik. Niuertarfimmi aqutsisussap suleqatigiinnik eqqortunik katersinissamik suliassaq pissanganarluinnartoq suliarissavaa, neriuppugullu Butik Natalie-mi maanna sulisut ilarpassui Brugsenimi nutaanik suliassarsiornissamut piumassuseqassasut.
Kalaallit Nunaanni Brugseni 2019-imi Nuussuarmi Ilulissanilu pisiniarfittaat ilanngullugit pisiniarfinnik katillugit 17-inik illoqarfinni arfineq-pingasuniittunik ingerlatsissaaq.
Assip allagartaa
Matumani takuneqarsinnaapput Svend Give Olesen aamma Susanne Christensen isumaqatigiissusioreernerup kingorna assammittut.
Aqqusinersuaq 4, 2 th. P.O.Box 1092 3900 Nuuk
Attaveqarfigitigut/Kontakt os
CVR 15787406
Kalaallit Nunaanni Brugseni pisianik utertitsisinnaasarpoq, imaluunniit aningaasartai utertissinnaasarpai pisinermiit ullut 14-it qaangiutsinnagit pisinermut uppernarsaat utertitsiniarnermi ilanngullugu takutinneqartillugu. Pisiaq ammarneqarsimassanngilaq.
Nioqqutissat nerisassat ilaanngillat.
Kalaallit Nunaanni Brugseni bytter gerne eller giver pengene retur inden for 14 dage fra købstidspunktet mod fremvisning af bon.
Varen skal være i ubrudt original emballage. Gælder ikke fødevarer.
© Copyright 2023 · Kalaallit Nunaanni Brugseni
Cookies og privatlivspolitik – Whistleblowerordning