“Maani Ilulissani sapaatip-akunnerata naanera immikkorluinnaq ittuuvoq pisoqarfiulluarlunilu. Katillugit 1000-inik nutaanik ilaasortaqalerpugut, illoqarfimmi siulersuisussanik nutaanik inissititerneqaqqammersunik qinersisitsisimalluta. Siulersuisunut ilaasortat nutaat tikilluaqquavut, Brugsenimullu nutaamut kusanartumut tunngatillugu suleqatiginissaat qilanaaraarput. Pisiniarfiup pisiassanik ilioraavigineqarnissaa Ilulissanilu pisinianut ilaasortanullu nutaanut ammarneqarnissaa utaqqisinnaanngingajapparput,” pisortaq Susanne Christensen oqarpoq.

Ilulissani sapaatip-akunnerata naanerani aaqqissuussaq nuannersoq inuppassuarnillu alakkarneqarluni. Marsip 16-ianni 17-iannilu Brugseni Ilulissaniittoq ilaasortanut ulloqartitseqqaarlunilu illoqarfimmiunik ataatsimiisitseqqaarpoq tamatumalu saniatigut Iluliarmiut pisiniarfiup initaavinut takornariartinneqarlutik. Tamakkua tamarmik kingunerannik illoqarfimmi peqatigiiffimmi sulineq aallartivinneqarpoq, illoqarfimmiunillu ataatsimiisitsinermi illoqarfimmi siulersuisut nutaat qinersisitsinikkut qinigaapput. Pisoq tamanna Brugsenimik nutaamik Ilulissani ammaanersuarmi pingaaruteqarpoq.

Ilimagisamit amerlanerungaartunik alakkaasoqarpoq

Inuppassuit ilaasortanut ulloritinneqartumi arfininngornermi marsip 16-ianni pisiniarfimmut alakkaapput. Illoqarfimmiut 2000-init amerlanerusut alakkaapput, 800-llu ilaasortanngorput.

”Illoqarfimmit tikilluaqqusaangaarnerput misigalugu nuanneqaaq. Pisiniarfittaarput isumalluarfigineqarpoq, pakatsisitsiumanatalu sapinngisarput tamaat iliuuseqarusuppugut,” siulersuisuunernut siulittaasoq Karla Egede Bisgaard oqarpoq, taanna siulersuisuunerni forretningsudvalgimiittut peqatigalugit illoqarfimmi ilaasortat nutaat naapisimaarpaat.

Sunit tamanit erseqqippoq 80-ikkunninngarnit angusaqarluarnerusoqarnissaa

Ukiut 1984-1990 Ilulissani brugsforeningimik ingerlatsinermik misiliiffiupput siulliit. Taamanikkut aningaasaqarnikkut pissutsit allanngoraqimmata aningaasatigullu annaasaqarfioqimmat suliniut unitsiinnarneqartariaqarpoq. Taamanikkut brugsforeningit Kalaallit Nunaanniittut kattutitinneqarnerat sioqqutitsiarlugu Ilulissani Brugseni akiliisinnaajunnaarpoq.

1991-imi Kalaallit Nunaanni brugsforeningit tamarmik ataatsimut Kalaallit Nunaanni Brugsenimik taaguuserlugit katinneqarput. Tamanna patajaallisitsivoq ineriartoqqilernissamullu tunngaviliilluni. Tunngavik nutaaq tamanna tunngavigalugu Kalaallit Nunaanni Brugseni Ilulissaniileqqippoq.

Siulersuisut nutaat qinigaareermata Brugsenimut Ilulissaniittumut isumalluartoqaqaaq. Pisiniarfittaamik ammaaneq ukiorpassuarni ilungersorluni sulinerup angusaqarluarnerullu kinguneraa, kikkullu tamarmik suliniut nutaaq iluatsilluaqqullugu sulilluarnissaminnut piareersimapput.

Ilulissani siulersuisunut ilaasortat ukuupput:

Siulittaasoq: Abia Ottosen

Siulittaasup tullia: Tuperna Heinrich

Siulersuisuunernut ilaasortaq: Johan Gundel

Allatsi: Dennis Tidselbak

Siulersuisunut ilaasortaq: Nuka Kleemann

Sulisunut sinniisussanik qinersisoqarumaarpoq pisiniarfik ammareerpat.

Assiliartap allagartaa:

Ilulissani Brugsenimi siulersuisunut ilaasortanngortut tallimat.