Kalaallit Nunaanni Brugsenip nersutaatillit Sofus Frederiksen aamma Niels Lund suleqatigalugit pitsaasumik Kalaallit Nunaanninngaanneersunik nersussuup neqaanik Brugsenip pisiniarfiinut tamanut qulakkeerinneqqipput. 

Neqi A/S suleqatigalugu aggorneqarput

2011-mi Brugseni aalajangerpoq Kalaallit Nunaata kujataani najugalinnut Sofus Frederiksen Niels Lundillu nersussuaataat nersussuaaqqanik 13-inik aningaasaliinermikkut tunissallugit. Brugseni taamaaliorpoq Brugsenip pisisartuni tamaasa nersussuup neqaanik pitsaasumik nunatsinneersunik pisiassaqartikkusullugit.

Uge 43-mi Narsami Neqi A/S-mi nersussuit Kalaallit Nunaanninngaanneersut 28-it toqorarneqarput, uge 45-llu tungaanut ineritinniarlugit nivingatinneqarlutik, neqaarniallu pikkorissut atorfilittagut uullisuullutik. Taamaalilluni nersussuup neqai pitsaasut Brugsenip pisiniarfiini tamani juullimut niuernissamut piareeqqalerput.

Kalaallit Nunaanneersut pitsaasut

Kalaallit Nunaata kujataani nersussuit alliartornerminni pitsaanerpaamik atugassaqartitaapput.

Alliartornerminni Kalaallit Nunaata pinngortitaani ivigartugaat pitsaaqisut, pitsaanerpaamillu atugassaqartitaanikuunerat pissutaallutik neqaata mamassusaa immikkuullarissumik mamassuseqarpoq.

“Tulluusimaarutigaarput 100 %-imik Kalaallit Nunaanneersuniit nersutaatilinnit sullitatsinnut pilersuisinnaagatta, Sofus Frederiksenip, Niels Lundip, Neqillu suleqatigilluarneri pingaartittupilussuuarput. Suliffeqarfittut tuniniakkatta pitsaalluinnarnissaat pingaartittupilussuuarput, allaanerussuteqarnissarpullu suliniutigisarparput, pingaartumik nunatsinninngaanneersuugaangata. Sofus Frederiksen aamma Niels Lundip nersutaateqarnerat assersuutaasinnaavoq suliniutit taama ittut tapersersorusuttagaratsigit.

Kalaallit Nunaanninngaanneersunik pitsaalluinnartunik, mamarluinnartunillu iggaviini allanik qinigassaqartippaatigut” pisortaq Susanne Christensen taama oqarpoq.

Nersussuup neqaa Brugsenip pisiniarfiini tamani

Aatsaat siullerpaamik nersussuup neqaa Brugsenip pisiniarfiini tamani pisiassaalerpoq. Nersussuup neqai immikkut ittunik nipputtartunik nalunaaqutsersugaapput, kalaaliminerniit tuniniakkatsinniit nalunaaqutsersorneri allaaneruniassammata.

Brugsenip nunatta pissarititaanik neqerooruteqarnissani immikkut iliuuseqarfigisarpaa, piffinni najugaqartut iliuuseqarusuttut, sullitat, ilaasortallu peqatigalugit aqqutit nutaat atorlugit niuernermi periarfissat ingerlavigerusuppai.