Immikkoortortaq Nuussuarmi Atertamiittoq, Nuussuarmi Brugseneeqqamik taaneqartartoq, apriilip ulluisa 30-ianni matuneqassasoq, Kalaallit Nunaanni Brugseni aalajangerpoq. Taassuma matuneqarnera ilutigalugu Brugseni Natalie-ip periarfissaqarnerulersillugu allineqarnissaata pilersaarutaanera, Kalaallit Nunaanni Brugsenip ilisimatitsissutigaa.

Nuussuarmi Brugsineeqqap matunissaa

Atertami Brugseneeqqap najugaqartut ukiorpanni nioqqutissanik assigiinngitsunik killilinnilli pilersugarai. Taanna najukkami pisiniarfeeqqatut iffiukkanik, qallersuutissanik, imeruersaatinik inuussutissanillu ataasiakkaanik pisiniarfiusinnaasutut atuuppoq.

– Nuussuarmi immikkoortortaararput ukiorpanni najukkami pisisartut pisariaqartitaannik nalinginnaanerpaanik pilersuisuuvoq, tuniniaanerulli ilaata annertuup Brugseni Natalie-mut Brugseni Qinngorpumullu nuunneragut, immikkoortortap ingerlannera imminut akilersinnaajunnaarpoq. Taamaammat pisiniarfeeraq ukioq manna kingusinnerpaamik apriilip ulluisa 30-ianni matuniarlugu aalajangerpugut, Jes Nyborg, Nuummi Brugsenip pisiniarfiini tuniniaanermi pisortaq oqaluttuarpoq.

Brugseni Natalie-ip allinissaa

2019-imi januaarip ulluisa 29-ianni pisiniarfiusimasup initaanik annertuumik iluarsaanerup nutarterereernerullu kingorna Nuussuarmi Brugseni Natalie ammarneqarpoq. Tamatuma kingorna pisiniarfik ornigarneqarluaqimmat annertunerusunik periarfissaqalersillugu allilerneqarnissaa pisariaqalersimavoq.

– Brugseni Natalie-ip ammarneraniit pisiniarfigineqarnerata tupinnaannartumik annertusinera misigineqarpoq, taannalu tassaavoq Nuussuarmi pisiniarfigisallugu kajumigineqarnerpaaq. Taamaammat pisisartugut periarfissanik suli pitsaanerusunik neqeroorfigisinnaajumallugit marloriaammik allineqarnissaa aalajangiupparput. Pisiniarfiuttaaq ilaanni neqaarniarfeqalissasoq, Jes Nyborgip oqaatigaa.

Suliniut suli pilersaarusiorneqarpoq, suliarlu aallartinneqarpat pisiniarfimmi ingerlatsinerup sapinngisamik akornusersorneqarpallaannginnissaa anguniagaavoq.

– Sanaartornerup nalaani pisiniarfiup nalinginnaasumik ingerlasinnaanissaanut, pisiniat sulisullu sapinngisamik akornusersorneqarpallaannginnissaat soorunalimi salliunneqarpoq. Pisisartutta sulisuttalu sanaartukkami nutaaliaanerusumi periarfissanik annertunerusunik neqeroorfiginissaat qilanaareqaarput, Jes Nyborg oqarpoq.

Suliniut pillugu paasissutissat annertunerusut Brugsenip paasissutissiiviisigut ilisimatitsissutaasassapput.