Menu
Menu
Ilulissani ataatsimeersuarneq workshoppernerlu iluatsilluartut
Arfininngorneq maajip 28-at 2022 Kalaallit Nunaanni Brugsenimut (KNB) ulluuvoq puiunaatsoq, inuit 53-it Hotel Arcticimi Ilulissaniittumi siulersuisut ilaasortanit qinigaaqqammersut illoqarfinnilu Brugsenip Kalaallit Nunaanni pisiniarfiuteqarfiini siunnersuisooqatigiit (Brugsenip Ilaasortaasa Sinniisaat – BIS) siullermeerlutik ileqquusumik ataatsimeersuarput. Ataatsimeersuarnermi siulersuisunut siulittaasumik siulittaasullu tullianik qinersisoqarpoq.
Ataatsimeersuarneq sioqqullugu peqataasut tamarmik suliffeqarfiup iluani ulluni marlunni workshopperlutik katersuupput, pingaartitanik KNB-p peqatigiiffimmut niuertarfeqarfimmullu tunngavigititaanik saqqummiussivigineqarlutik. Tamatuma saniatigut Ilulissani pisuni KNB-mi siulersuisut nutaat qullersaqarfillu siullermeerlutik kiinarsillutik naapipput.
Illoqarfinni sammisassaqartitsinerit nuna tamakkerlugu aallaavigalugu
Hotel Arcticimi Greenland Room 2022-mi maajip 26-anni 27-annilu siulersuisunut ilaasortat BIS-imullu ilaasortat nutaat peqataalluarfigisaannik workshopperfiuvoq.
– Hotel Arcticimi ataatsimiittarfissuaq kusanartoq attartorparput workshoppeqataasunut ataatsimeersuaqataasunullu tamanut pitsaanerpaanik avatangiiseqartitserusukkatta. Ataatsimiittarfissuaq plakaterpassuarnik Nunarsuarmut anguniakkanik 17-inik FN-illu Global Compactianik suliaqarnitsinneersunik, pisiniarfiutitta sulisuttalu assinginik, Brugsenip allagartaasa ilaannik allarpassuarnillu kusassarparput. Taakkualu saniatigut Hotel Arcticimi sulisunit sullilluarneqaratta ikiorneqarattalu pitsaalluinnartunik avatangiiseqarpugut, pisortaq Susanne Christensen oqaluttuarpoq.
Ullut taakku peqatigiiffimmi ungasissumiit naapinnissamut, ilisarisimasartaarnissamut, suliassallu nuna tamakkerlugu illoqarfinnilu immikkut suliarineqartussat pillugit ilisimasanik isumassarsianillu avitseqatigiinnissamut katersuuffiupput. KNB-mut periusissiaq nutaaq niuertarfeqarfimmut nutaamik sammivissiivoq, ilaasortanik illoqarfinni tunngavissiinikkut nutaanillu siulersuisoqalernikkut nuna tamakkerlugu sunik anguniagaqarnissaq aalajangerneqartarmat.
– Ukiuni qaangiuttuni KNB-mi pisortartatta ilarpassui pisortatut ilinniarfitsinni Brugseni ”Suugaq”-mik taasatsinni ilinniarsimapput. Ilinniakkami tamatumani tatigeqatigiilluni attaveqatigiilernissamik tamatumalu qanoq attannissaanik assigiinngitsutigut ilinniartinneqarpugut, ilinniakkavullu taakkua ilaat workshoppimi peqataasut ilarpassuisa siullerpaamik naapeqatigiiffianni Brugsenimilu peqatigiiffilereqataaqqaarfianni atorneqarput, Benny Reffeldt Otte, Sulisoqarnermut, Attaveqatigiinnermut Pilerisaarinermullu pisortaasoq oqaluttuarpoq.
Ilaasortat sinniisaat nutaat (BIS), illoqarfinni siunnersuisooqatigiiusut illoqarfinni tamani sinniisussatut ilaasortanit qinigaasut, suliassaminnik suliarinninnissaminnut iluaqutissarsipput. Illoqarfinnit tamanit peqataasut sammisassanik ukiumut pilersaarusiorneq ulapputigaat, tamatumalu saniatigut suliniutinik ingerlatsinissamut illoqarfinnilu missingersuusiornissamut iluaqutissarsipput.
– Ilaasortat sinniisaat illoqarfinnit assigiinngitsuneersut naapeqatigiissikkusuppavut ikioqatigiinniassammata isumassarsiseqatigiinniassammatalu, tamatumalu saniatigut uterunik atoriaannaasaannik iluaqutissikkusukkatsigit. Ullut marluk taakku suliaqarfiulluarput. Ilaasortanut nuannersunik sammisassaqartitsiviusussanik illoqarfinnut tamanut annertuunik pilersaarusiorpugut nunarsuarmullu anguniakkat piujuartitsiniarluni suliniuteqarnermi annikitsutigut qanoq atorneqarsinnaanerannik isumassarsioqatigiilluta.
KNB-mi siulersuisut nutaat siulittaasortaarlu
Siulersuisunut ilaasortat Brugsenimut ilaasortaasunit qinigaasortaat apriili qinersisoqarmalli siullerpaamik naapeqatigiipput. Siulersuisunut ilaasortat nutaat tamarmik ulluni workshopperfiusuni aallussilluarput, illoqarfinni tamani ilaasortanut sinniisut nutaat siulersuisunut toqqaannartumik attaveqassammata.
Ataatsimeersuarnermi aamma siulittaasumik, siulittaasup tullianik sinniisussanillu qinersisoqarpoq, atorfiillu ima agguataarneqarput:
– KNB-mut tamarmut siulersuisunut siulittaasutut qinigaanera tulluusimaarutigalugulu qujamasuutigaara. Ukiorpassuarni Qaqortumiit Brugsenimi peqatigiiffilereqataasarsimavunga, maannalu misilittakkama nuna tamakkerlugu suliami atornissaannut qilanaareqaara. Brugseni suliffeqarfittut Kalaallit Nunaannut pingaaruteqarpoq, suliffeqarfillu ingerlalluartuaqqullugu avatangiisillu allanngorartuartut malillugit ineriartoqqullugu sapinngisannik iliussaanga. Pingaartitat suliffeqarfiup tunngavigisai tutsuigaakka, siunissamilu sammivissiueqataanissara qilanaaraara, siulersuisunut siulittaasortaaq Mogens Fontain oqaluttuarpoq.
Piffissami takkuttumi maannakkut siulersuisunut ilaasortaasut siulersuisunut ilaasortassanik marlunnik allanik toqqaassapput, taakkua piginnaasaannik pikkorissarfissaannillu misissueqqissaareerlutik. Kingorna siulersuisut katillugit arfineq-marlunnik ilaasortaqalissapput, taakkulu KNB-p Kalaallit Nunaanni sulineranik siumut sammivissiuissapput.
Aqqusinersuaq 4, 2 th. P.O.Box 1092 3900 Nuuk
Attaveqarfigitigut/Kontakt os
CVR 15787406
Kalaallit Nunaanni Brugseni pisianik utertitsisinnaasarpoq, imaluunniit aningaasartai utertissinnaasarpai pisinermiit ullut 14-it qaangiutsinnagit pisinermut uppernarsaat utertitsiniarnermi ilanngullugu takutinneqartillugu. Pisiaq ammarneqarsimassanngilaq.
Nioqqutissat nerisassat ilaanngillat.
Kalaallit Nunaanni Brugseni bytter gerne eller giver pengene retur inden for 14 dage fra købstidspunktet mod fremvisning af bon.
Varen skal være i ubrudt original emballage. Gælder ikke fødevarer.
© Copyright 2023 · Kalaallit Nunaanni Brugseni
Cookies og privatlivspolitik – Whistleblowerordning