Aggustip 1-iat aallarnerfigalugu Randi Vestergaard Evaldsen Kalaallit Nunaanni Brugsenimi pisiortornermi pisortanngussaaq. Pisiniarfinni pingaarnernik pisiortornermut tamarmut akisussaaffeqalissaaq suleqatigiinnullu pisiortortartunut pisiassanillu pilersaarusiortartunut siuttuusussaassalluni.

Randi Vestergaard Evaldsen Nukissiorfinni pisiortornermik aaqqissuussisutut pisiortortutullu atorfeqarnikuuvoq. Aammattaaq sivisuumik politikkimik suliaqartarsimavoq Demokraatinullu nuna tamakkerlugu kommunimi politikeritut siuttuusimalluni. Nunat tamalaat akornanni niuernermi pilerisaarinermilu qaffasinnerusumik ilinniagaqarpoq serviceøkonomitullu ilinniagaqarluni.

– Kalaallit Nunaanni Brugsenimi pisiortornermi pisortatut atorfininnera qujamasuutigeqaara. Suliffeqarfik nuannerunartippara inuiaqatigiit, avatangiisit akisussaaffiillu eqqarsaatigalugit pingaartitat pitsaalluinnartut paasiuminartullu tunngavigalugit ingerlanneqarmat. Suliffeqarfiuvoq Kalaallit Nunaanni inuiaqatigiinnut assut iluaqutaasoq, Great Place to Work-imillu uppernarsaaserneqarnermikkut aamma uppernarsarpaat sulisuminnut akisussaassuseqarluarlutik, Randi Vestergaard Evaldsen oqarpoq.

Aammattaaq Randi Vestergaard Evaldsen pisiortornermi pisortatut atorfittaamini aalajangerpoq politikkikkut sulinermini allannguerujussuarniarluni. Aalajangerpoq Inatsisartuni kommunalbestyrelsemilu siulittaasutut tunuarniarluni.

– Nutaamik aallartitsiniarluni aalajangerneq imaannaajuaannanngilaq, maannali inuuninni killiffinni ingerlaqqikkusuppunga nutaanillu misileraarusullunga. Demokraatini angusavut tulluusimaarutigaakka, maannali Kalaallit Nunaanni pisiniarfeqarfimmik, isummat politikkikkut suliniarnermi tunngaveqaannarnani suliffiusumik, sullissillunga allamik siunnerfeqarnissara qilanaaraara.

Pisiortornermi pisortap nutaap pingaarnertut suliassarai pisiortortartut pisiassanillu pilersaarusiortartut ullormut ingerlatsinermik ataqatigiissaarinermi suleqatigiissinnissaat piffissamilu allannguiffiusumi aqutsisoqatigiinniittut allat peqatigalugit Kalaallit Nunaanni Brugsenimik ikiuinissaq, pisiniarfeqarfimmimi pisiassanillu aqutsinermi tamarmi IT atorlugu aaqqiissutissat nutaat suli atorneqarneruleraluttuinnassammata.

– Randi pisiortornermi pisortatut atorfininnissaminut akuersimmat nuannaaqaanga, suleqatiginissaalu qilanaaraarput. Piffissami Kalaallit Nunaanni Brugsenimut soqutiginarluinnartumi siuariartorfiusumilu nutaanillu suliniutissaqalerfiusumi suliassami pisortaanermilu piginnaaneqarluarpoq. Tamatuma saniatigut nuannaarutigaara aqutsisoqatigiit arnamik suli allamik ilaneqarmata, pisortaq Susanne Christensen oqarpoq.