Brugseni logo

Poortuutit pillugit nalunaarummik avammut ammanerulersitsineq

2022-mi ukiakkut ataatsimiinnermi Inatsisartut aalajangerput Naalakkersuisut peqquniarlugit immiaaqqanut imeruersaatinullu kulsyremik akulinnut poortuutit puullu pillugit nutaanik malittarisassiussasut. Malittarisassiat piareersimasussaapput kingusinnerpaamik januaarip 1-ianni 2024.

Nutaanik malittarisassiortoqarnissaanut siunertaavoq Nuuk Imeq A/S-ip kisermaassineranik atorunnaarsitsinissaq immiaaqqanik imeruersaatinillu kulsyremik akulinnik qillertuusanik, plastikkimik igalaaminermillu puulinnik nuna tamakkerlugu tuniniaasoqarnissaanik akuersinikkut, taakkua ilusaat angissusaallu apeqqutaatinnagit, Naalakkersuisunit akuerisaasumik utertinneqarsinnaappata.

Nalunaarut pillugu tusarniaasoqassaaq aggustip 28-at 2023 tikillugu.

Unammillernartut periarfissaasunit amerlanerupput

Siunnersuut ammaffigaarput uagut pisisartuvut immiaaqqanik imeruersaatinillu kulsyremik akulinnik soorunami toqqagassaqarnerutikkusukkatsigit.

Avammulli ammanerulersitsisoqarnissaanut qaammatit sisamaannanngorneranni massakkorpiaq qaangerniagassarisarput ilaatigut tassaavoq niuertarfeqarfiit malittarisassianik suli malitassaqaratillu tunngavissaqannginnerat.

2022-mi decembarimi ESANI A/S niuertarfeqarfinnik arlalinnik qaaqqusivoq suleqatigiissitanut poortuutissat pillugit nalunaarummut atatillugu qaangerniagassanik erseqqissaasussanut peqataaqqusilluni. Niuertarfeqarnermi suliaqartuusugut suleqatigiissitani suliniuteqaqataavugut allannguutillu pillugit oqalliffinni allani oqalliseqataasimalluta.

Apeqqutit akissutinit amerlanerupput

Piffissami qaangiuttumi ESANI A/S-ip suliniummi periaasia pitsaallunilu iluaqutaasimavoq, politikkikkulli ullumikkut suli aalajangiisoqarsimanngimmat – malittarisassiat atuutilernissaannut qaammatit sisamaannanngorneranni – apeqqutissavut akissutaasunit amerlanerungaatsiarput.

Immiaaqqanik imeruersaatinillu kulsyremik akulinnik nunanit allanit pisiortortarnitsinnut tunngatillugu apeqqutit uku suli akineqanngillat:

  • Pisiortorfigisartakkavut immiaaqqanik imeruersaatinillu kulsyremik akulinnik Kalaallit Nunaannut nassiussigaangamik utertitsinermut qanoq akeqartitsisassappat?
  • Utertitsinermut aki kikkunnut akilerneqartassava? Akileraarnermut Aqutsisoqarfimmut? Taakkualu systemeqarpat tamatumunnga naleqqussakkamik?
  • Pisiortorfigisartakkatta systemitik Kalaallit Nunaanni utertitsinermut allatut akeqartitsisinnaasunut naleqqussaassapput – taamaaliornissamut piffissaliussaq qanoq sivikitsigissava?

Puunik tigusatsinnik suliaqarnissatsinnut tunngatillugu apeqqutit uku suli akineqanngillat:

  • Puut sumut nassiunneqartassappat?
  • Utertitsinermut aki akiligassatut qanoq isumannaarneqassava?
  • Puiaasanik utertitsiviit pisiniarfinni 16-iniittut puunut assigiinngitsorpassuarnut nutaanut qanoq naleqqussassavavut?

Siunissami aningaasaliilluta pisaarisassatsitut pilersaarutitsinnut tunngatillugu apeqqutit uku suli akineqanngillat:

  • Puut assigiinngitsorpassuit nutaat tigusinnaajumallugit suliarisinnaajumallugillu puiaasanik utertitsiviit qanoq allanngortinneqassappat/ilassuteqarfigineqassappat?
  • Aningaasaliilluni pisaartornerit kiap akilissavai? Niuertarfeqarfiit kisimik akiliisuussappata taamalu kinguneranik atuisunut akit qaffallutik?
  • Danmarkimi pisiortorfigisartakkatta Kalaallit Nunaanni tamarmi niuertarfippassuarnut puiaasanik utertitsisarfinnik nassiussinissartik saniatigullu atortussanik ikkussuinissartik angumerisinnaanerpaat?

Apeqqut akineqanngitsoq alla tassaavoq poortuutit pillugit nalunaarummi sorpiaat aamma pineqarnersut. Assersuutigalugu imeruersaatit eqiiallannartut utertitsisarnermut aaqqissuussamut nutaamut ilanngunneqassappat? Taakkununnga puut ullumikkut annertoorujussuupput.

Puunut akitsuutit qaffarujussuarnissaat ilimanarpoq

Imeruersaatinik 0,25 liiterinit annertunerusunik tikisitsinikkut puunut akitsuutit ullumikkut 3,50 kr.-iupput. Taakku nioqqutissanut eqqussukkanuinnaq, immiaaqqanut sodavandinullu Nuuk Imeq A/S-imeersuunngitsunut, akilerneqartarpoq.

Kalaallit Nunaanni atuisut 2022-mitulli 2024-mi immiaarartorlutillu sodavanditortigissappata akitsuutigineqalersut 125 mio. kr. missaanniissapput – taakkulu atuisartunit akilerneqartussanngussapput, nioqqutissat eqqussat akitsornissaannik ilimasaarneqaqqaarsimanatik. Akitsuut nutaaq tamanna politikkikkut atuutitiinnarneqarumavoq, isummerfigineqarumanngilarli.

Naggataatigut atuisoq nioqqutissarpassuarnik nutaanik, ilaatigut niuertarfeqarfiit aningaasaliillutik pisiortugaannik matussutissanut akitsuutinillu nutaanik 125 mio. kr. missaanniittunik, akiliisutuaassaaq. Tassa imaappoq, Kalaallit Nunaanni innuttaasut tamarmik immikkut minnerpaamik 2.200 kr.-inik akiliissapput!

MASSAKKUT aalajangiisoqartariaqarpoq!

Kalaallit Nunaanni politikerit MASSAKKUT aalajangeeqquvagut!

Massakkut aalajanginngippata januaarip 1-ianni 2024 poortuutit pillugu nalunaarummut tunngasunut sunulluunniit piareersimanavianngilagut – tamannalu pisiortorfigisartakkatsinnut, sulisutsinnut pisiniartartunullu akornutaangaassaaq.

Aqqusinersuaq 4, 2 th. P.O.Box 1092 3900 Nuuk
Attaveqarfigitigut/Kontakt os
CVR 15787406

Kalaallit Nunaanni Brugseni pisianik utertitsisinnaasarpoq, imaluunniit aningaasartai utertissinnaasarpai pisinermiit ullut 14-it qaangiutsinnagit pisinermut uppernarsaat utertitsiniarnermi ilanngullugu takutinneqartillugu. Pisiaq ammarneqarsimassanngilaq.
Nioqqutissat nerisassat ilaanngillat.

Kalaallit Nunaanni Brugseni bytter gerne eller giver pengene retur inden for 14 dage fra købstidspunktet mod fremvisning af bon.
Varen skal være i ubrudt original emballage. Gælder ikke fødevarer.

© Copyright 2023 · Kalaallit Nunaanni Brugseni 
Cookies og privatlivspolitik – Whistleblowerordning

Følg Brugseni

Facebook