Menu
Menu
Brugsenimi nalliuttorsiortut marluk nalliuttorsiuutigineqarput
Decembarip aallartinnerani ukiorpassuarni Brugsenimi aalajaallutik sulisimasut marluk nalliuttorsiutigineqassapput. Brugseni Sisimiuniittumi Inger Nielsen ukiunik 50-inngortorsiorpoq, Nuummilu Brugsenip sullissiviani Elisabeth Villadsen ukiunik 40-nngortorsiorpoq.
– Nalliuttorsiortortavut aalajaallutillu pikkorissut marluk ukiorpassuarni Brugsenimiissimasut tulluusimaarutigeqaavut! Tamarmik immikkut suliffimminni suleqataalluarsimapput, aamma silarsuatsinni, Kalaallit Nunaanni Brugsenimilu allanngoriartorfioqisuni ineriartornerit malinnaaffigisinnaasimavaat, pisortaq Susanne Christensen oqaluttuarpoq.
Sisimiuni allaffimmi pingaaruteqarluinnartoq
Inger Nielsen, tallimanngornermi decembarip 1-ianni Brugsenimi ukiunik 50-inik nalliuttorsiortoq ukiorpassuarni aalajaalluni allaffimmiuusimavoq. Sisimiuni aallartissimavoq praktikkerluni, inuusuttuaqqatut sulisuulluni kingusinnerusukkullu atorfinilluni. Piffissami pisiniarfissuarmi pisiniarfeeqqanilu Sisimiuniittuni allanngoriartorfioqisumi malinnaasimavoq, tamatumalu saniatigut suleriaatsit aaqqissuussaanerlu arlaleriarlutik allanngortinneqartarsimapput.
– Inger Sisimiuni allaffimmi pingaaruteqarluinnartuaannarsimavoq. Avatangiisiminik toqqissisimanartuutitsiuaannarlunilu allanngujuitsuutitsiuartarsimavoq, Ingerillu imminut suliassiissutigineqartunik tamanik malittarinnittarnissaa qularutissaaneq ajorpoq. Aammattaaq pisiniarfiit allaffissornikkut ingerlatsiviinut taarserartunik pisortaqartartunut attaviulluarsimavoq aalajaatsoq. Inger tulluusimaarutigeqigatsigu aalajangerpugut illoqarfimmiut tamaasa peqatigalugit nalliuttorsiutiginiarlugu, pisortaq Susanne Christensen oqaluttuarpoq.
Tallimanngorpat decembarip aallaqqaataani Inger Nielsen Sisimiuni kaffisortitsilluta Brugsenimilu bankortitsilluta nalliuttorsiutigissavarput. Illoqarfimmiittut tamarmik kaffillerfigineqassapput mamartuerniarfimmilu ussigassaqassalluni nal. 13-17, nuannersunillu eqqugassartalimmik akeqanngitsumik bankortitsisoqassaaq nal. 17.15-imiit. Arfininngornermi decembarip 2-anni Sisimiuni pisiniarfiit pingasut tamarmik nal. 18 matussapput ilaqutaasut sulisullu unnussiuaarnissamut qaaqqusaammata.
Nuup sullissiviani qaarsoq aalajaatsoq
Kalaallit Nunaanni Brugsenimi Nuummi sullissiviup allaffeqarfianni Elisabeth Villadsen ukiuni 40-ni naatsorsuuserivimmi allaffissornikkullu ingerlatsivimmi pingaaruteqarsimavoq. 1983-imi allaffimmiunngornialerpoq ukiorpassuillu ingerlanerini Brugsenip qitiusumik allaffissornikkut suliassanut atatillugu pitsaasunik allanngujuitsunillu suleriaaseqartoqarnissaanik qulakkeereqataasimalluni.
– Eli – Elisabeth taama taasaratsigu – allaffimmi sullissivimmi suleqatiminit tamanit nuannarineqaqaaq. Sulisut taassumatulli tunniusimatigaluni aalajaatsigisut amerlanngeqaat – tamatta tatigisaraarput! Eli piffissami IT-mi nutaanik atortorissaaruteqarfioqisumi malinnaasinnaasimavoq, aamma nipaannera isumassuineralu allaffimmi ingerlallualersitseqataajuarsimavoq. Sulisut piffissaq eqqorlugu akissarsitinneqarnissaannik suliassaminillu naammassinnilluarnissaminik pingaartitsiuaannarpoq, pisortaq Susanne Christensen oqaluttuarpoq.
Tallimanngorpat decembarip aallaqqaataani Elisabeth Villadsen pillugu nalliuttorsiortitsisoqassaaq ilaqutaasut Nuummilu allaffimmi sullissivimmi sulisut Hotel Hans Egedemut neriartoqqusaallutik. Kikkut tamarmik ukiorpassuarni Brugsenimi suleqatigisimasaminnik nalliuttorsioqateqarnissartik qilanaaraat.
– Kalaallit Nunaanni Brugseni sinnerlugu nalliuttorsiortortavut marluk, Inger Nielsen aamma Elisabeth Villadsen, pilluaqqungaarusuppakka. Taama tunniusimatigisunik pikkoritsigisunik suleqateqarnerput tulluusimaarutigeqaarput! Nuannernerpaamik nalliuttorsiutiginissaat qilanaaraarput, pisortaq Susanne Christensen naggasiivoq.
Aqqusinersuaq 4, 2 th. P.O.Box 1092 3900 Nuuk
Attaveqarfigitigut/Kontakt os
CVR 15787406
Kalaallit Nunaanni Brugseni pisianik utertitsisinnaasarpoq, imaluunniit aningaasartai utertissinnaasarpai pisinermiit ullut 14-it qaangiutsinnagit pisinermut uppernarsaat utertitsiniarnermi ilanngullugu takutinneqartillugu. Pisiaq ammarneqarsimassanngilaq.
Nioqqutissat nerisassat ilaanngillat.
Kalaallit Nunaanni Brugseni bytter gerne eller giver pengene retur inden for 14 dage fra købstidspunktet mod fremvisning af bon.
Varen skal være i ubrudt original emballage. Gælder ikke fødevarer.
© Copyright 2023 · Kalaallit Nunaanni Brugseni
Cookies og privatlivspolitik – Whistleblowerordning