Ukioq kusanartunik pisiniarfittaarfik Kalaallillu Nunaanni amerlanerusut suliffissaqalerfik

Kalaallit Nunaanni Brugseni (KNB) ukiumi naatsorsuiffimmi 2019-imi angusaqarluarpoq. 2019-imi angusat annikitsumik sinneqartoorfiupput 603.000 kr.-inik. Naatsorsuutigisatsinnit sinneqartoorneruvugut Ilulissani Nuummilu pisiniarfittaanik ammaanermut aningaasaliissutigineqartut annertungaatsiarmata. 5 millioninik amigartooruteqarnissaq missingersuusiarisimavarput, annaasaqanngilagulli.

Pisortap Susanne Christensenip angusat ima allaatigai: ”Ukioq naatsorsuiffik 2019 aningaasaliiffigisanit soqutiginartunit angusaqarluarfiusimavoq. Ilulissani Nuummilu pisiniarfittaat aningaasaqarnikkut pilersaarusiornermi pingaaruteqarsimapput, ukiumilu siullermi ingerlalluarsimanerat nuannersumik tupaallaatigaarput. Ingammik Ilulissani pisiniartartunit ilassilluarneqarnissarput siumut oqaatigisinnaasimanngilarput. Eqqaasinneqaqqippugut kalaallinit 100%-imik pigineqarnissatta qanoq pingaaruteqartigineranik. Angusaqarluarsimanerput pillugu innuttaasut qutsavissaraavut!”

Kalaallit Nunaanni suliffissat amerlinerat aamma ”Great Place to Work”

2019-imi pisiniarfinnik ammaanermi KNB siuariarluarsimavoq. 2019-ip naalernerani 559-inik sulisoqarpoq, piffissap ilaannaa sulisartut inuusuttuaqqallu ilanngullugit. 2018-ip naanerani 473-inik sulisoqarpoq. Taamaattumik tulluusimaarpugut oqarsinnaagatta inuiaqatigiinnut kalaallinut suliffissanik 80-inik nutaanik pilersitsisimalluta.

Suliffeqarfittut kalaallinit pigineqartutut misigivugut pingaaruteqartoq sapinngisatsinnik iliuuseqarnissarput suliffinnik pilersitsiniarluta taamalu Nunatsinnik ineriartortitsilluta. Taamaattumik tulluusimaarutigaarput sulisortaarpassuatsinnik suliffeqarfitsinnut tikilluaqqusinerput.

Aammattaaq 2019 ukiuuvoq ukiut aappassaannik ”Great Place to Work”-itut taaguuteqarfipput. Maannamiit anguniagariuaannalerput ukiut tamaasa tamatuminnga nersornaaserneqartarnissarput. Tamanna angujumallugu sulisutta suliffimmi pitsaanerpaanik avatangiiseqarnissaat qulakkeerniarlugu unammillertuartariaqarlutalu sulissuteqartuartariaqarpugut. KNB-mi sulineq nuannersuutikkusupparput kikkut tamarmik pitsaasunik atugaqartinnerisigut. Sulisuvut iluatsilluarnitsinni pingaaruteqarluinnartutut isigaavut.

KNB-p kronit 17 millionit ilaasortanut utertippai

Ilaasortanut pilersaarut Divi Plussi, ilaasortatut pisiat nalingisa 3%-iinik ilaasortaanermut kontomut tunineqarfiusartoq, atorlugu KNB-p 2019-imi ilaasortanut kronit 17 millionit ilaasortanut utertitsivoq.

2019-ip ingerlanerani ilaasortat Divi Plussimi kroninit 17 millioninit amerlanerusunik katersagaqarsimapput, ukiullu naanerani aningaasat taakkua amerlanersaat pisiassanik allanik pisissutigineqarsimapput. Akinik unammilliutaasinnaalluartunik neqeroorutinillu pitsaalluinnartunik atuinerup saniatigut KNB taamaalilluni ilaqutariinnik Kalaallit Nunaanniittunik tusindilinnik ikiuisimavoq Brugsenimi pisiniartarnikkut akissaqarnerulersitsilluni.

Decembarip 31-anni 2019-imi ilaasortat katillutik 41.321-upput, 2018-imi ullormut tamatumunnga naleqqiussilluni 3.448-nik qaffariaataalluni.

Iluaqutissat allarpassuit

Divi Plussip, ilaasortanut utertittakkatta, saniatigut ullut tamaasa pisiniarnermi misigisat sapinngisamik pitsaasuutinniarsarisarpavut. 2019-imi Brugseni app-i illoqarfinni arfineq-pingasuni, KNB-p pisiniarfiuteqarfigisaani, ilaasortanit atorluarneqarpoq. Periarfissat nutaat, soorlu neqeroorutinik aviisit digitaliusut pitsanngorsakkat pisiassanillu allattuivik torraasoq, iluaqutigalugit ilaasortavut neqeroorutinik tamanik malinnaaviginninnissamut pisiassaminnillu pilersaarusiornissamut amerlanernik nutaaliaasunillu periarfissaqalerput.

Ilulissani Brugsenimik nutaamik ammaanermut tunngatillugu Brugseni app-i atortullu digitaliusut atorlugit ilaasortanngortitsineq immikkoortortamik nutaamik ammaanermi pingaarutilittut qitiutinneqarput. Ilaasortarpassuit namminneq mobilitik aqqutigalugit ilaasortanngorput, ilarpassuili aamma pisiniarfimmi sulisunit ikiorneqarlutik ilaasortanngorput.

2019-ip naanerani Ilulissani 2300-nik nutaanik ilaasortaqalerpoq, sumiiffimmilu tamatumani innuttaasut ilarpassui ilaasortanngortuupput. Brugseni app-i aamma Iluliarmiunut, pisiniarfik ammaqqaarmalli atortorissaarutinik digitaliusunik atuillualersimasut, atortorissaarutaasimavoq pingaarutilik.

Siunissami pisussat

KNB-mit ukiup soqutiginartup nutaanik unamminiagassartallip ilaasortallu avatangiisivullu pillugit pitsaasunik suliniuteqarfissap iserfigilluarnissaa qilanaarineqarpoq.

Suliffeqarfiup inuiaqatigiinnut akisussaassuseqarnera siunissarlu ungasinnerusoq eqqarsaatigalugu periusissiat pitsaasut FN-ip piujuartitsinissamik nunarsuarmut anguniagaanik pingaartitsiniarluni KNB-p suli suliniuteqarnerunissaanik qulakkeerutaasussat 2020-mi immikkut ukkatarineqassapput.

Aqqusinersuaq 4, 2 th. P.O.Box 1092 3900 Nuuk
M: info@knb.gl T: +299 36 35 00 
CVR 15787406

Kalaallit Nunaanni Brugseni pisianik utertitsisinnaasarpoq, imaluunniit aningaasartai utertissinnaasarpai pisinermiit ullut 14-it qaangiutsinnagit pisinermut uppernarsaat utertitsiniarnermi ilanngullugu takutinneqartillugu. Pisiaq ammarneqarsimassanngilaq.
Nioqqutissat nerisassat ilaanngillat.

Kalaallit Nunaanni Brugseni bytter gerne eller giver pengene retur inden for 14 dage fra købstidspunktet mod fremvisning af bon.
Varen skal være i ubrudt original emballage. Gælder ikke fødevarer.

© Copyright 2021 · Kalaallit Nunaanni Brugseni 
Cookies og privatlivspolitik

Følg Brugseni