Pisiniarfimmik, marlunngornermi apriilip 30-anni Kalaallit Nunaanni Brugsenip ammarniagaatut angitigisumik, Ilulissani tunngaviliiumalluni nukiit atorneqarsinnaasut tamarmik atorneqartariaqarput. Aamma sulisuusimasut marluk, aappaa Maniitsumeersoq aappaalu Nuummersoq pisiniarfimmi tuniniaavittaarpassuarnik tunngaviliinermik suliarinneqataapput. Sulisut taakku marluk siorna soraarninngorput, Ilulissanili pisunut peqataarusunnermik aqutsisunut namminneq attaveqarput namminerlu piumassutsiminnik suleqataanissaminnik qinnuteqarlutik.

Ane Katrine Barksmann (Nukamik taaneqartartoq) Nuummiuuvoq inuunermilu ilarujussuani Brugsenimi Nuummiittumi sulisimalluni. Katillugit ukiuni 43-ni Brugsenimi sulisuusimavoq nonfoodimilu atisaarniarfimmilu Nuummi ukiuni kingullerni suliaqarfigisimasamini misilittagaqarluarluni.

Josva Lyberth Maniitsormiuuvoq Brugseneeqqamilu ukiorpaalunni pisortaasimalluni. Taanna ukiuni 44-ni Brugsenimi sulisuusimavoq, pingaarnertut pisortatut suliassanik nerisassanillu tamanik aaqqissuussinermik suliaqarsimalluni.

– Qujamasuutigeqaarput Josva Nukalu Ilulissani suleqatigiittorpassuarnut peqataasinnaasimammata! Sulisut taakku ukiorpassuit ingerlanerini iliuuseqangaatsiarsimapput, nuannaarutigeqaarpullu peqataarusussimammata. Josva Nukalu suliartortuni takkuteqqaartartunut kingullertullu anisartunut ilaapput. Tamatta taakkua misilittagaqarluarnerat sulerusussuseqarnersuallu asseqanngitsoq ilinniarfigilluarsinnaavavut, pisortaq Susanne Christensen oqaluttuarpoq.

Josva Nukalu kaffisullatsiarneranni attavigaavut, oqaluttuuppaatigullu sooq Ilulissani suleqataarusussimanerlutik.

– Ukiorpassuarni Brugsenimi sulisimagaluarlunga pisiniarfimmi nutaarluinnarmi pisiassanik ilioqqaaqataanikuunngisaannarpunga. Nuannaarutigeqaara peqataasinnaagama, panigalu suleqatigeqqissinnaagakku. Brugsenimiittut uannut ilaquttatut ipput, maannalu Ilulissaniippunga ikiuutaaniarlunga, aammali maani suleqatigiittut ataatsimuussuserput immikkorluinnaq ittoq iluaqutigiumallugu. Qularutiginngilara Iluliarmiut tamarmik pisiniarfiup angissusia kusanassusialu tupaallaatigiumaaraat, Ane Katrine Barksmann oqaluttuarpoq.

– Suleqataaqqilernera uannut immikkorluinnaq ittuuvoq. Illorsuaq nutaaq Brugseniusussaq pillugu tusarama eqqarsarpunga suleqataasariaqarlunga. Nukap oqarneratulli pisiniarfimmi nutaarluinnarmi pisiassanik ilioqqaaqataaneq uannuttaaq immikkorluinnaq ippoq, suut tamarmik naqqaniit sananeqarlutillu inissinneqarsimallutik. Inuillu illoqarfimmi naapikkaanni malunnartarpoq pisiarfissuup ammarneqarnissaa assut qilanaarineqartoq.

Nuka Josvalu peqatigalugit pisiniarfittaamik ammaanissamik suleqatigiit tamarmik marlunngornermi apriilip 30-anni Iluliarmiunut tamanut qilanaaraat. Ullormut tamatumunnga pisussanik pilersaarusiorluartoqarsimavoq.