– CO2e-mik atuinermik naatsorsuutit, FN-ip nunarsuarmi anguniagai 17-it aamma Global Compact –

Brugsenip 2021-mut piujuartitsinermik nalunaarusiaa tamanut tusagassiarineqarpoq. Brugsenimi tulluusimaarutigaarput pisiniartartuvut tamaasa suliffeqarfitta Kalaallit Nunaata piujuartitsiviunerusumik siunissaqarnissaanik qulakkeeriniarluni suliaanik tamakkiisunik takutitsivigisinnaagatsigit.

2021-mut nalunaarusiamiittut ilagaat suliffeqarfiup CO2e-mik atuineranik naatsorsutit siulliit. Suliaq tamanna aallarniutaaginnarpoq siunissami aallutassatsinnut, tamatuminngalu suliaqarnitsinni tamatigut paasiuminartumik sulinissarput siunertaraarput. Paasissutissat tamatumunnga atassuteqartut tamaasa suli piginngilavut, avatangiisinulli qanorpiaq sunniuteqarnerput takutinniarlugu siunissami qanoq suliniarnerluta pilersaarusiorpugut. Kalaallit Nunaat inuussutissarsiortunit paasissutissaateqaleqqullugu peqataanissarput siunertaraarput nuna tamakkerlugu avatangiisinut sunniutit ataatsimut naatsorsorneqarsinnaaniassammata, Kalaallit Nunaata Parisimi isumaqatigiissut eqqarsaatigalugu inissisimalluarnerulissutigisinnaasaanik.

Taamatuttaaq Brugsenip ingerlariaqqilluni ukioq manna FN-ip Global Compactianut qanoq ilaalersimanera pillugu atuarsinnaavutit. Tamanna FN-ip inuttut pisinnaatitaaffinnut, sulisut pisinnaatitaaffiinut, avatangiisinut peqquserlullunilu iluanaarniarnermik akiuiniarnermut najoqqutassiai pingaarnerit qulinut tunngatillugu tamanut ammasumik paasiuminartumik suliaqarnermi siuttuunissamut pisussaaffeqalissutigaarput. Sammisat taakku pingaartittuarsimavavut, maannali nunani tamalaani tunngavissatut iluaqutissat aallaavigalugit periusissiorluta sulisinnaanngorpugut.

Nalunaarusiami allaatigineqarportaaq suliffeqarfiup FN-ip nunarsuarmi anguniagaanik 17-inik suliaqarnera. Suliarput soqutiginaqisoq ingerlatiinnarlugu anguniakkatta ilarpassui angujartuaarpavut. Piujuartitsinermik suliaqarnerput suliffeqarfitsinnik ingerlatsinitsinnut tunngaviusunut ilaavoq, siunissamilu allarpassuarnik periarfissaqalernissaa qilanaaraarput.

– Suliat aallarnikkavut pissanganaqaat. Pisinnaasatta killeqarnerat ilisimaarivarput, siunitsinnilu suli suliassarpassuaqarpugut. Pikkorinnerulernissarput sulissutigiuarparput. Nammineq suliarisatta saniatigut Kalaallit Nunaanni inuussutissarsiornermi suleqatigiinnermi piumassuseqalersitseqataarusuppugut. Namminersorlutik inuussutissarsiuteqartut Naalakkersuisullu pitsaasorpassuarnik suliniuteqarlutik suleqatigiinnerannik sunneqatigiissitsisoqarsinnaassappat isumaqarpugut Kalaallit Nunaanni siunissami piujuartitsilerluarsinnaassalluta, pisortaq Susanne Christensen oqaluttuarpoq.

Neriuppugut soqutiginnittut tamarmik nalunaarusiaq atuarumaaraat Kalaallillu Nunaanni allanngueqataanissamut ikiorumaaraatigut.

”Piginneqatigiilluta ineriartortitsisa, sapinngilagut”

Nalunaarusiaq uani ammarneqarsinnaavoq: