Maanna illit Meeqqat Ikiortigip meeqqat Nunatsinni pisinnaatitaaffiinik sulissutiginninnerannik tapersuisinnaalerputit qaammatisiutinik nutaanik 2020-moortunik Meeqqat Ikiortigimeersunik Brugsenini tamani pisinikkut. Iluanaarutigineqartut affaat ilanngarnagit Kalaallit Nunaanni Meeqqat Ikiortigimut tunniunneqassapput.

Brugseni Kalaallit Nunaanni Meeqqat Ikiortigit assiliisorlu Carsten Egevang suleqatigalugit 2020-moortunik qaammatisiutiliortitsivoq. Qaammatisiutini sammineqarput meeqqat Kalaallit Nunaanni pisinnaatitaaffii, maannalu Brugsenini tamani pisiarineqarsinnaavoq. Iluanaarutigineqartut affaat ukiup nutaap aallartinnerani Kalaallit Nunaanni Meeqqat Ikiortigimut tunissutigineqarumaarput.

– Meeqqat Ikiortigip meeqqat Kalaallit Nunaanni pisinnaatitaaffiisa ilisimaneqarnerulernissaannik sulissuteqarnera pingaaruteqartorujussuuvoq. Suliniummik aallartitsivugut peqatigiiffiup suliaanut pitsaasumut tapiissusseqarniarluta, aamma iluaqutaajumalluta – pingaarutilimmi matumanissaaq – aningaasanik tunissuteqarumalluta. Ilusilersuisarfipput Meeqqat Ikiortigik assiliisorlu Carsten Egevang suleqatigalugit 2020-ut kusanartumik qaammatisiutiliorpoq maanna pisiniarfiutitsinni tamani pisiarineqarsinnaasumik, pilerisaarinermi attaveqarnermilu pisortaq Benny Reffelt Otte oqaluttuarpoq.

Qaammatisiutit kusanartut assiliisup Carsten Egevangip, Nunatsinni kommunit ilarpassuini ilaqutariit meerartallit assigiinngitsut qanimut malinnaaviginiarlugit angalasimasup, assilisaanik nuannersunik assiliartalersugaapput. Qaammatisiutini takuneqarsinnaapput meeqqat Kalaallit Nunaanniittut kalaallisut qangaaniilli inooriaaserineqarsimasumik inooriaaseqarlutik nalitsinnilu allanngulertorfiusumi periartortut. Tamatuma saniatigut qaammatisiutini meeqqat pisinnaatitaaffii pillugit paasissutissaqarluarpoq, taakkua FN-ip meeqqat pillugit isumaqatigiissutaani allassimanerattut.

– Tulluusimaarutigaarput suliniut pitsaasoq tamanna tapersersorsinnaagatsigu. Kalaallit Nunaanni Brugsenimi isumaqarpugut meeqqat inuusuttullu toqqissisimanartunik aalajangersimasunillu tunngavissaqarlutik toqqissisimanartunik aalaakkaasunillu ulluinnaqarnissamut pisinnaatitaasut. Taamaattumik aalajangerpugut qaammatisiutinut taakkununnga tunngatillugu tapersersuiniarluta meeqqat pisinnaatitaaffii pillugit oqariartuutit pingaarutillit siaruaanniassagatsigit, pisortaq Susanne Christensen oqarpoq.

2020-mut qaammatisiutit ataatsit Brugseni 149 kr.-ilerlugit pisiarineqarsinnaapput. Nalingata affai Kalaallit Nunaanni Meeqqat Ikiortigimut ilanngarnagit tunniunneqassapput.