Brugsenip CSR-nalunaarusiaa kingulleq maanna saqqummiunneqarpoq, suliffeqarfiullu inuiaqatigiinnut akisussaassuseqarnermut tunngatillugu suliaqarnermi periaasiat nutaarluinnaasoq allaatigineqarpoq. FN-ip nunarsuarmi anguniagai aallunneqarput, Brugsenilu maanna inuiaqatigiinnut akisussaassuseqarnermi periusissiugaanerusumik sulilerpoq suliffeqarfik Kalaallit Nunaata 2030 tikillugu anguniakkanik naammassinninniarnerani suli iliuuseqaqataanerulerniassammat.

Pisiniarfiutivut Kalaallit Nunaanni ilaqutariippassuarnit ullut tamarluinnaasa katersuuffigineqartarput. Kalaallit Nunaanni innuttaasunut attaveqangaatsiaratta nunatsinni allanngueqataanissamut asseqanngilluinnartunik periarfissaqarpugut. Peqatigiiffittut ilaasortalittut qinersiffiusartutullu inuiaqatigiinni pisunik paasisimaqarluarnermik tunngaveqartumik aaqqiissuteqartarnissarput kiffartuussisarnissarpullu noqqaassutigaarput.

Inuiaqatigiinnut akisussaassuseqarnermi suliavut suliffeqarfimmik ingerlatsinitsinni pingaarnerpaanut ilaapput. Ukioq 2020 inuiaqatigiinnut akisussaassutsimik suliatsinnik immikkut aaqqissuussiviuvoq, taamalu maanna inuiaqatigiit pisariaqartitaannik kivitsilluarnerusinnaalluta – suliffeqarfitta nukittuffii asseqanngitsut tunngavigalugit. Piujuartitsinermik pingaartitserusuppugut, tamannali Kalaallit Nunaanni Brugsenimut Kalaallillu Nunaannut iluaqutaasariaqarpoq.

– Suliffeqarfittut ukioq manna inuiaqatigiinni piujuartitsilluni ineriartortitsinermi FN-ip nunarsuarmi anguniagai 17-it toraarlugit suliniuteqaqataavilerpugut. Suliffeqarfitta sutigut Kalaallit Nunaanni malunnartumik iluaqutaasinnaaneranik erseqqissaanikkut inuiaqatigiinnut akisussaassuseqarneq pillugu maannamiit aaqqissugaalluarnerusumik suliniuteqalernissamut piareersimavugut. Tamatuminnga suleqatigiissuteqarneq takorluukkatsinnut matumunnga naapertuuppoq: ”Piginneqatigiilluta ineriartortitsisa, sapinngilagut”. Nalunaarusiami tamatumani suliavut saqqummiutissavavut suliffeqarfiullu 2030-mut anguniagaanik paasissutissiissalluta. Kalaallit Nunaanni inuussutissarsiornermi suleqatigiinnermi kajumissisitseqataarusuppugut. Namminersorlutik inuussutissarsiuteqartut Naalakkersuisullu pitsaasorpassuarnik suliniuteqarlutik suleqatigiinnerannik sunneqatigiissitsisoqarsinnaassappat, isumaqarpugut Kalaallit Nunaanni siunissami piujuartitsilerluarsinnaassalluta, pisortaq Susanne Christensen oqaluttuarpoq.

Brugseni nunarsuarmi anguniakkanik 17-inik tamanik tapersersuivoq suliffeqarfiullu immikkut suliniuteqarfigisinnaasaanik sivisuumik inissiiniarsimalluni. Nunarsuarmi anguniakkat ilaat sisamat (nunarsuarmi anguniakkat 3, 4, 12 aamma 17) immikkut suliniuteqarfissatut toqqarneqarput. CSR-nalunaarusiatsinni kingullermi suliffeqarfiup sulinera siunissamullu anguniagai pillugit paasissutissaqarluarpoq.