Kalaallit Nunaanni Brugsenip oqaluttuarisaanerani siulersuisuunerni siulittaasuusimasut inuusunnersaat!

Ukioq manna Kalaallit Nunaanni Brugsenip ataatsimeersuartitsinerani arlalinnut tunngatillugu puigunaatsuussaaq.

Arfininngornermi septembarip 26-anni 2020-mi Kalaallit Nunaanni Brugseni digitaliulluinnartumik siullerpaamik ataatsimeersuartitsivoq ilaatigullu siulersuisuunerit nutaat ivertinneqarlutik. Covid-19-imut atatillugu killilersuisoqarmat aqutsisoqatigiinnit aalajangiunneqarpoq ataatsimeersuarneq digitaliussasoq, illoqarfinnit katillugit arfineq-pingasuneersunit kommuninit assigiinngitsuneersut katersuuttussanngormata. Illoqarfinni taakkunani siulersuisunut ilaasortaasut internetikkut najuupput, taasisitsinerlu ajornaquteqanngitsumik ingerlanneqarsinnaasimavoq.

Kalaallit Nunaanni Brugsenip ataatsimeersuartitsinerani oqaluttuarisaanermut ilanngunneqartussamik pisoqarpoq Avijâja Jepsen 27-nik ukiulik siulersuisuunernut siulittaasussatut, suliffeqarfimmi aqutsinermi qullersaasussatut, qinerneqarmat. Taassuma piumassuseqarnera, nutaanik sammisaqarusussuseqarnera pitsaasunillu isumassarsiaqarnera ilaasortaasut sinnerisa iluarinartippaat, Avijâja Jepsenip Nuummi siulersuisuni suliaanut tunngatillugu, aammali ukiuni marlunni kingullerni siulersuisuunerni ilaasortatut suliaanut tunngatillugu. Tamakkua tamarmik qinigaanerpaaneranik kinguneqartitsipput, taamaattumillu Kalaallit Nunaanni Brugsenip oqaluttuarisaanerani siulittaasut inuusunnersaattut qinigaavoq.

Avijâja Jepsen Kalaallit Nunaanni Brugsenimi 2019-imi Nuummi siulersuisuniilerpoq ilaasortaannaalluni. Tamatumunnga tunngatillugu illoqarfimmi sammisassaqartitsinernik assigiinngitsunik peqqissutsimik sammisaqarfiusunik, ilaatigut meeqqanik peqqissutsimillu immikkut pingaartitsilluni Brugsenip arpatitsinerani pisuttuaqatigiissitsineranillu, pilersaarusioqataavoq. Ukioq taanna Nuummi siulersuisunit qinigaavoq siulersuisuunerni Nuummiunut sinniisussatut. Avijâja Jepsen peqatigiiffilerinermi aallussilluartutut soqutiginnilluartutullu ilisimaneqarpoq.

– Brugseni ilaasortanit pigineqarpoq, nuannareqaaralu suliffeqarfimmut inuiaqatigiinni ineriartornissamik pingaartitsisumut pitsanngorsartuarumasumullu tunngavisseeqataasinnaanera. Misigivunga Brugseni ilaasortaminut inuiaqatigiinnullu tamanut iluaqutissiiniartuartoq. Qilanaareqaara siulersuisunut ilaasortat direktionimiittullu pikkorissut piginnaaneqarluartullu peqatigalugit tamatuminnga suliaqarnissara, ataatsimeersuarnermilu tatigineqarnera tulluusimaarutigaara imminullu ajukkullunga. Aamma neriuutigaara inuusuttunik allanik kajumissisitsisinnaassallunga inuiaqatigiinni pisunik isummerfiginninnissamut sunniuteqarfigisinnaasaminnilu sunniuteqarniarnissamut, Avijâja Jepsen oqaluttuarpoq.

Avijâja Jepsen, Nuummi inunngorlunilu peroriartortoq, Nukissiorfiit aqutsisoqarnermi allatseqarfianni atorfeqarpoq Statskundskabimilu kandidatinngornikuulluni Pearson College UWC-millu Canadamiittumit International Baccalaureate Diplomaqarluni.

Maanna Avijâja Jepsen siulersuisuunerni siulittaasutut atorfeqalerpoq siulersuisuunerit Kalaallit Nunaanni Brugsenip siumut siunnerfissaa pillugu aalajangigassanik demokratiskiusunik suliaqarneranni siuttuussalluni.

– Niuertarfeqarfik Brugsenitut annertutigisoq inuiaqatigiinni inuppassuillu ulluinnaanni pingaaruteqarpoq. Brugsenimik piginnittut Brugsenimilu naleqartitat eqqarsaatigalugit inuttut pisinnaatitaaffinni avatangiisinillu illersuiniarnermi suliffeqarfittut maligassiuisunngoriartornissaanut periarfissarpassuaqartutut isigaara, ingammik inuiaqatigiinni akisussaassuseqarnermi sammivissatut aalajangiussaq aqqutigalugu FN-ip nunarsuarmut anguniagaasa pingaaruteqarluinnarfianni, Avijâja Jepsen oqarpoq.

Kalaallit Nunaanni Brugsenip oqaluttuarisaanerani siulittaasutut inuusunnersaalluni Avijâja Jepsen inuusuttunut allanut, Kalaallit Nunaanni suliffeqarfiit annersaasa ilaanni peqatigiiffilerinermut sunniuteqaqataarusuttunut, maligassaalluarpoq.

– Inuusuttut aalajangersimallutik iliuuseqartut takullugit kajumissinaqaaq. Direktøritut Avijâjamik suleqateqarnissara assut qilanaaraara. Aallarnisaanissamut piginnaaneqarnini takutereerpaa siulersuisunilu pikkorissaarluni suleriaasianit erseqqippoq peqatigiiffilerinermi inuusuttunik tikilluaqqusinerunissaq qanoq pingaaruteqartigisoq. Tulluusimaarutigaara suliffeqarfiuteqaratta nutaanik periaaseqarnissamut sapiissuseqartumik. Qularnanngilluinnarpoq Avijâja akisussaaffimmik nutaamik kivitsinissamut piumassuseqarlunilu piginnaaneqartoq, direktøri Susanne Christensen oqarpoq.

Erseqqissaat

Kalaallit Nunaanni Brugsenimi siulersuisuunernut ilaasortaalersut:

Siulittaasoq – Formand: Avijâja Jepsen
Siulittaasup Tullia – 1. næstformand: Karla Egede Bisgaard
Siulittaasup tulliata aappaa – 2. næstformand: Petrine Thomsen
Ilaasortaq – Bestyrelsesmedlem: Aalipaaraq Kreutzmann
Ilaasortaq – Bestyrelsesmedlem: Najârak’ Petersen
Ilaasortaq – Bestyrelsesmedlem: Johan Gundel
Ilaasortaq – Bestyrelsesmedlem: Svend Åge Olsen
Ilaasortaq – Bestyrelsesmedlem: Gertrud Geisler
Sulisut Sinnerlugit Qinigaq – Medarbejderrep.: Arnannguaq Larsen

Aqqusinersuaq 4, 2 th. P.O.Box 1092 3900 Nuuk
M: info@knb.gl T: +299 36 35 00 
CVR 15787406

Kalaallit Nunaanni Brugseni pisianik utertitsisinnaasarpoq, imaluunniit aningaasartai utertissinnaasarpai pisinermiit ullut 14-it qaangiutsinnagit pisinermut uppernarsaat utertitsiniarnermi ilanngullugu takutinneqartillugu. Pisiaq ammarneqarsimassanngilaq.
Nioqqutissat nerisassat ilaanngillat.

Kalaallit Nunaanni Brugseni bytter gerne eller giver pengene retur inden for 14 dage fra købstidspunktet mod fremvisning af bon.
Varen skal være i ubrudt original emballage. Gælder ikke fødevarer.

© Copyright 2021 · Kalaallit Nunaanni Brugseni 
Cookies og privatlivspolitik

Følg Brugseni